Qırımda işğalli mahkeme tarafından 15,5 yıl apis cezasına mahküm etilgen siyasiy mabüs Volodımır Yakımenko müstemlekede ayatı içün telükeli şaraitte tutula — tibbiy yardımnıñ yoqluğı ve ruhiy basqı sağlığınıñ ciddiy bozulmasına ketirdi.
Onıñ apayı Olena Yakımenko Qırımtatar Maaliy Merkezine bunı bildirdi.
Olena aytqanı kibi, apishanede aş pek yaramay, Volodımırnıñ hronik hastalığı sebebinden bu pek telükeli.
"Mide gastriti ve on eki barmaq içeginiñ ülserini çekkende mahsus dietanı tutmaq kerek, amma bunı hayal etmek bile kerekmey, bunı añlaymız", — dep Olena Yakımenko qayd etti.
Onıñ aytqanına köre, müstemleke memuriyeti oña tibbiy yardım bermey. Advokatqa ağır aşqazan ağrıları şikâyet etken soñ, Volodımırğa aşı yaptırğanlar, amma SİZO hadimleri onı ameliyatqa alıp barmağa red ettiler. Tedaviylenmek yerine, oña tek dört ap berdiler.
2025 senesiniñ başından Volodımır endi 42 kün ceza izolâtorında keçirdi. Soñki eki yıl devamında SİZO ve STŞSert tutuluv şaraitide buluna.
"Böyle şaraitte sağlıq vaziyeti fenalaşa, hronik hastalıqları tedaviylenmey, 8 yıl içinde tişleriniñ alı pek fenalaştı. Baş ağrıları ve ruhiy hastalıqları sıq rastkeldi", — dep apayı qayd etti.
Fizikiy azaplardan ğayrı, Volodımır Yakımenko maneviy basqığa da oğray. Olena aytqanı kibi, müstemleke hadimleri, hususan, cenk mevzusını qullanıp, onı muntazam sürette çatışmağa çekireler. Appelâtsiya muracaatları qabul etilmey, oña ise yalıñız yarım yılda bir kere 20 kilogramm ağırlığında posılkalar izin berile. Qorantalarnen bağ da pek sıñırlı. Şimdilik başqa bir müessisege etap etilmesi planlaştırılmay.
Hatırlatamız ki, Volodımır Yakımenko — Herson vilâyetiniñ Çaplınka köyünden taksi aydavcısı ve Avtomaydan faalcisidir. 2014 senesinden soñ, o, göñülli faaliyetnen oğraşa ve Ukrayina Arbiy Silâlı quvetlerine yardım ete edi, bundan da ğayrı, işğalden soñ yarımadanı terk etken Qırım sakinlerini alıp kete edi. Erkekni narkotik taşımasında qabaatladılar. Kremlniñ kontroli altında bulunğan Qırım mahkemesi onı müstemlekede 15,5 yılğa üküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
