Ğarbiy kütleviy haber vastalarında, AQŞnıñ Rusiye tarafından işğal etilgen Ukrayin Qırımını Rusiye toprağı olaraq tanıması aqqında malümat peyda olğanda, "Sarı şerit" cemaat areketi Qırım sakinleriniñ tuvğan yarımada içün 11 yıllıq küreşini hatırlattı.
Çiçek ayınıñ 23-nde areket, öz Х saifesinde bunı bildirdi.
Faalciler, Qırımnıñ Rusiye işğaline qarşı Ukrayin muqavemet merkezi olğanını qayd ettiler.
"On bir yıl devam etken repressiya, taqip ve teşviqat neticesinde biñlernen insan narazılıq bildirmege devam ete. Ve bu, Rusiye yarımadanı arbiy istihbarat merkezine çevirgenine baqmadan ola. Rusiye yarımadağa aman-aman yarım million ruslarnı alıp ketkenine baqmadan, mal-mülkni alıp ketti, medeniyetni yoq etti, tarihnı yañıdan yazdı", — dep "Sarı şerit" koordinatorları qayd ettiler.
Olarnıñ aytqanlarına köre, Qırım sakinleriniñ narazılığını tek Ukrayinada degil de, AQŞ, Frenkistan, Almaniya ve Büyük Britaniyada köreler. Onıñ içün faalciler Qırım işğaline qarşılıq köstermege devam etecekler, dep qayd ettiler.
AQŞ ne dey
AQŞnıñ prezidentiniñ muavini Cey Di Vensniñ jurnalistlerge bergen izaatında, AQŞ "ruslar ve ukrayinlilerge pek açıq teklif berdi, ve ya olar "ebet" deycek, ya da Qoşma Ştatlar bu esnastan çıqacaq", dep bildirdi.
Onıñ aytqanına köre, soñki adım olmasa da, soñki adımlardan biri yapmaq kerek, yani taraflar "öldürüvlerni toqtatmaq, topraq sıñırlarını bugünki seviyede olğanına yaqın bir seviyede buzlatmaq" niyetinde olğanını açıqtan bildirmek kerek.
Ukrainanıñ nazar noqtası
Çiçek ayınıñ 22-nde jurnalistlernen subetleşkende prezident Volodımır Zelenskıy, Ukrayina Rusiye tarafından vaqtınca işğal etilgen topraqlarnı deñişüv ya da red etüv meselesinde resmiy teklifler almadı, dep bildirdi — şimdilik tek haber vastalarında peyda olğan malümat aqqında söz yürsetile. Aynı zamanda Ukrayina Qırımnıñ Rusiye Federatsiyasınıñ işğaline iç bir vaqıt qanuniy şekilde tanımaycaq, çünki bu Anayasağa ve devlet suverenitetine qarşı kele.
"Ukrayina Qırımnıñ işğalini qanuniy olaraq tanımay. Bu bizim toprağımız, Ukrayina halqınıñ toprağıdır. Bu mevzuda laf etmemelimiz — Anayasağa zıt kele", — dedi Zelenskıy.
Devlet yolbaşçısınıñ aytqanına köre, Qırım ve Rusiyeniñ vaqtınca işğal etken diger topraqları meselesi muzakere etilse, cenkniñ devam etmesine ketire.
O şunı da bildirdi ki, ateş toqtatılacaq soñ ukrayin tarafı "er angi şekil"de muzakere masalarına oturmağa azır.
Avropa Birligi AQŞnı Qırımnıñ Rusiye tarafından tanınmasından tenbiyeley
Avropa Birliginiñ baş diplomatı Kaya Kallas Vaşingtonnı işğal etilgen Qırımnıñ Rusiye qısmı olaraq tanınması Kremlniñ faydasına olacaq bir hata olacağı aqqında tenbiyeledi.
O, ABniñ 2014 senesi işğal etilgen yarımadanı Rusiye toprağı olaraq iç bir vaqıt tanımaycağını qoştı.
"Qırım — bu Ukrayinadır. İşğal altındaki insanlar içün bu pek müimdir — diger memleketler Qırımnı Rusiye olaraq tanımamaları", — dep qayd etti o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
