2025 senesiniñ ilk üç ayı içinde işğal etilgen Qırımda siyasiy mabüslerniñ 10 etap adisesi qayd etildi. Olardan sekizi qırımtatarlarnen bağlı. 2024 senesiniñ 8 adisesi ve 2023 senesiniñ 22 adisesinen qıyaslanğanda, vaziyet kritik qala.
Qırımtatar Maaliy Merkeziniñ derc etkeni 2025 senesiniñ birinci kvartalında işğal etilgen Qırımda insan aqlarınıñ bozuluvı talilinde bu aqqında aytıla.
Vesiqada qayd etilgenine köre, bu devirde Boğdan Ziza, Arsen Abhairov, Yevğen Jukov, Volodımır Maladayka, Volodımır Saqada, Zaur Abdullayev, Eskender Abdulganiyev ve Rustem Murasov basqığa oğradı.
"Siyasiy mabüslerniñ etapı insaniyetsiz şaraitte keçe. İşğalli akimiyet siyasiy sebeplerden esirlerni Qırım tışına alıp kete — tutuv yerleri civarındaki cemiyetniñ destegi yoq etilsin, qorantalarnen bağ qıyınlaştırılsın ve advokatlarnıñ kirişi sıñırlansın", — dep uquq qoruyıcılar qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
