2024 senesi Qırımnıñ işğalli makemeleri ve Rusiye Federatsiyasınıñ birinci instantsiya makemeleri eñ az 66 insannı qanunsız şekilde maküm etti. Apellâtsiya makemeleri 25 insannıñ davasını, kassatsiya makemeleri ise 33 insannıñ davasını baqtı. Davalar adaletli makeme aqqınıñ bozuluvınen devam ete edi.
Bu malümatnı QırımSOS uquq qorçalayıcı teşkilâtı qayd etti.
Qayd etildi ki, makeme esnasları halqara uquq qaideleriniñ bozuluvınen keçti: davalar qanunsız şekilde teşkil etilgen makemeler tarafından baqıldı, qabaatlanğanlar qorçalav imkânlarından marum etildi, makemeciler ise işğalli quvet qurulışlarınıñ basqısı altında areket etti. Bundan da ğayrı, deliller sıq-sıq uydurılğan edi, şaatlıqlar ise ruhiy ve fizikiy basqı neticesinde elde etilgen edi.
"Eñ sıq rastkelgen qabaatlavlar arasında devlet hainligi, işğalli memuriyetniñ vekillerine qarşı suiqast, casuslıq, ateşke berüv ve çeşit obyektlerni patlatuv edi. Apellâtsiya ve kassatsiya makemeleri çoqusı allarda ükümlerni deñiştirmedi. Bundan da ğayrı, Ukrainanıñ işğal etilgen topraqlarınıñ bir çoq sakinine qarşı davalar halqara gumanitar uquq normalarına zıt kelgen şekilde Rusiye toprağında yerleşken makemeler tarafından baqıldı", — dep aytıla haberde.
Eñ çoq üküm Rostov-na-Donudaki Cenübiy bölgeniñ arbiy makemesi, "Qırım Cumhuriyeti Yuqarı makemesi" ve "Sevastopol şeer makemesi" çıqarğan edi.
Apellâtsiya makemeleri beş kişige apis cezasını berdi, daa evel birinci instantsiya makemesi olarğa yımşaq cezalar berdi. Tek dört dava çerçivesinde — Yehova Şaatlarınıñ diniy toplulığınıñ vekillerine nisbeten — qabaatlav qararları lâğu etildi. Kassatsiya makemesi, SİZOda vefat etken Cemil Ğafarovdan ğayrı, ükümlerini deñiştirmedi.
Hatırlatamız ki, QırımSOSnıñ malümatına köre, 2024 senesi eñ azından 56 insan qanunsız cinaiy taqipniñ qurbanı oldı. Ukraina qanunlarına köre cinayet sayılmağan faaliyet içün Qırım sakinlerini taqip eteler. Hususan, Rusiye tarafından terrorcı sayılğan Hizb ut-Tahrir diniy teşkilâtınıñ azalarını. İşğalli FSB Qırım sakinlerine qarşı "aşırıcılıqqa açıq çağıruvlar" içün davalar açtı, Herson faalcisi İrına Ğorobtsova "casuslıq"ta, Lüdmıla Kolesnikova ise anasınıñ cenazesine İrlandiyadan kelgen soñ "devlet hainligi"nde qabaatlandı.
Telegram, WhatsApp ve Facebookta Suspilne Qırım haberlerine abune oluñız