Kiçik aynıñ 17-nde saba qar yağğanı sebebinden işğal etilgen Qırımda Yalta yolları qıyınlaştı. Bundan ğayrı, Nikita köyünde, şeerden 9 kilometr şarqta yerleşken Nikita nebatat bağçası da işini toqtattı.
RİA "Novosti Krım" bunı bildirdi.
Agentlikniñ malümatına köre, kiçik aynıñ 16-nda aqşam Qırımnıñ cenübiy yalısındaki yollarda tıqanıqlıqlar peyda oldı: maşinalar keçip olamadı.
Sabağa qadar yollar qısmen temizlengen edi, dep Yalta işğalli yolbaşçısı Yanina Pavlenko Telegramda yazdı.
"Bugün ava şaraiti qıyın — yağanaqlar aman-aman 20 mm yağdı, ava arareti minus derecesinde qala. Yollarnı baqmaq içün endi 400 tonnadan çoq reagent qullanıldı, işler devam ete", — dep aytıla haberde.
Yanina Pavlenkonıñ aytqanına köre, ava şaraiti sebebinden balalar ana-babalarınıñ isteginen oquv yurtlarına bara bileler.
İşğalli "Krımenergo"nıñ haber etkenine köre, şeerniñ bir qısmı Kyiv vaqtına köre saat 10:00da elektriksiz qaldı, sündürilmeniñ sebebi aydınlatılmadı.
Hatırlatamız ki, yarımadada kiçik aynıñ 16. künü aqşam ve 17-nde gece furtuna telükesi ilân etildi. Kiçik aynıñ 17-de kündüz sinoptikler qar, tuman ve buzlavuq olacağını tahmin ete, dep işğal etilgen Qırımnıñ "Fevqulâde vaziyetler nazirligi" bildirdi.
Telegram, WhatsApp ve Facebookta Suspilne Qırım haberlerine abune oluñız