Qırım yarımadasınıñ qaramanlarına bağışlanğan leyha qara qış ayınıñ 10-nda Kıyivdeki "Gulliver" alış-veriş merkezinde açıldı. Leyhanıñ maqsadı: Qırım Ukrainanıñ parçası olğanını hatırlatmaqtır.
Suspilne Qırım mühbiri bunı bildirdi.
Fotoresimler sergisi mustaqillik örnegi olğan ayatları, muvafaqiyetleri ve nazar noqtaları aqqında ikâye ete.
Teşebbüsniñ qaramanları arasında: "Ukrainska pravda"nıñ baş muarriri Sevgil Musayeva, qırımtatar halqınıñ lideri Mustafa Cemilev, Ukraina halq mebusı Tamil Taşeva, yırcı Jamala, rejissör Ahtem Seytablayev, arbiy ekim Asan İsenaciyev ve gimnastikacı Anna Rizatdinova.
Olimpiada ğalibi ve bediiy gimnastika boyunca dünya çempionı Anna Rizatdinova da serginiñ teşebbüsçisi ola.
"Men tamır Qırım sakini olam ve bunıñnen ğururlanam, ve er fırsatta Qırımdan olğanımnı açıqtan ve eminliknen aytam. Bu fotoresimler sergisiniñ esas ğayesi — Qırım Ukrainanıñ qısmı olğanını hatırlatmaqtır. Bu kibi teşebbüsler bizni birleştire. Qırımnı qaytarmaq içün elimizden kelgenini yapa bilemiz, em bedeniy, em ruhiy ceetten. 10 yıldır biz, tamır Qırım sakinleri, evge qaytıp olamaymız, ve bu kerçekten de canımıznı raatsızlandıra", — dedi o.
"Menim içün Qırım — Vatanım, Qırım — evimdir. Men bilem ki, şimdi degil, belki de yarın degil, amma onı oğullarıma köstermege pek isteyim", — dep serginiñ açılışında Jamala ayttı.
Fotoresimlerniñ müellifi — ömür arqadaşı Vlada Liberovanen beraber Ukrainada Rusiye istilâsınıñ ilk künlerinden berli yapqan cinayetlerini vesiqalaştırğan Kostântın Liberov. Leyha eki afta devam etecek.
Telegram, WhatsApp ve Facebookta Suspilne Qırım haberlerine abune oluñız