13 senege maküm etilgen Qırım siyasiy mabüsi Rustem Seitmemetov qalp krizi ve yürek ameliyatını aldı. Oña üçünci derece saqatlığı belgilendi, lâkin ilâc ve kerekli yardımğa irişim sıñırlanğanı sebebinden sağlığı fenalaşa.
Onıñ apayı Zera Seitmemetova Qırım birdemligine bunı bildirdi.
Rustem Seştmemetov 2024 senesi mayıs ayında miokard infarktını çekti. Bundan soñ oña yürekten ameliyat yapıldı — şunt ameliyatı. Soñra apishanede yapılğan tibbiy teşkerüv, sağlığınıñ ciddiy fenalaşqanını tasdiqladı. Seitmemetovğa üçünci derece saqatlığı belgilendi, bundan soñ onı Salavattaki tüzetüv müstemlekesine qaytardılar.
"Onı apiske almazdan evel onıñ bir de bir hastalığı yoq edi. Beş yıl devamında sağlığı fenalaştı", — dep tarif etti siyasiy mabüsniñ apayı.
Rustem Seitmametovnı sıq-sıq yüksek basım ve apiske alınmazdan evel olmağan köz kataraktası raatsızlay. Tibbiy teşkerüvniñ neticelerine köre, siyasiy mabüsge ilâclar yazıldı, amma olarnıñ çoqusı müstemlekeniñ tibbiy bölüginde izin berilgen cedvelge kirmey.
Rustem Seitmemetov aqqında ne bilemiz
Rustem Seitmemetov — pedagog, evlengen soñ qurucı olıp çalışa edi. İşdeşleri ve iş bericileri onı işançlı ve cevapkâr adlandıralar. Tevqif etilmeden evel ailesi ve apayınıñ ana-babasıı baqqan edi.
2020 senesi saban ayınıñ 11. künü işğal etilgen Bağçasarayda rus quvetçileri, bir qaç qırımtatar adamınıñ evlerini tinttiler: Amet Süleymanov, Qırım birdemligi"niñ eski faalcisi olğan ve bir qaç sene Qırımdan ketmege mecbur olğan Seitumer ve qardaşı Osman Seitumerov, emcesi Rustem Seitmemetov.
2021 senesi orta küz ayında Rostov-na-Donudaki Cenübiy bölge arbiy makemesi Seitumer Seitumerov, Osman Seitumerov, Rustem Seitumerov ve Amet Süleymanovnı 17, 14, 13 ve 12 senege maküm etti.
İmaye etici taraf bildirdi ki, davanıñ bilgilerinde qabaatlanğan adamlarnıñ yanında silâ, patlayıcı malzemeler ve patlayıcı alet alğanları, terror aktını yapmağa planlaştırğanları ve başqalarını bunı yapmağa çağırğanlarını "delil etken bir şey yoq". Davanıñ bilgilerinde Bağçasaray camilerinde siyaset ve din muzakereleriniñ çıqarılğan sesleri bar.
2023 senesi çiçek ayında Seitmemetov apayına "Zonatelekom" apihane ağınen haber berdi ki, 15 kilogramğa azdı. Keçkende onı, Dimitrovğraddaki rus apishanesine etap ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız