Orta küz ayınıñ 22. künü Ukraina Yuqarı Şurasınıñ başı Ruslan Stefançuknıñ Estoniyağa resmiy ziyareti vaqtında prezidentniñ Qırım Muhtar Cumhuriyetindeki Temsilciliginiñ taqımı orta küz ayınıñ 9-nda Riyğikoğuda (Estoniya parlamenti) taqdim etilgen "QIRIM İÇÜN" Qırım aqqında sergisinen ekskursiyanı keçirdi.
Prezidentniñ QMCnin temsilciligi bu aqqında haber etti.
Eksponatlarnı Stefançuk, Reyğikoğu spikeri Lauri Hussar ve Estoniya parlamentiniñ azaları kördiler. Tedbir vaqtında parlamentniñ vekillerine Ukraina tamır halqı — qırımtatarlar medeniyetini saqlav müimligi, em de olarnıñ öz toprağında yaşamaq aqqı içün küreşi aqqında tarif ettiler.
Hususan, "Paalı fiyatnen" ekspozitsiyası, qırımtatar ressamlarınıñ işleri, Sürgünlik Kündeligi, qırımtatar tarihı aqqında sketçler, tuvğan Qırımnı işğalden qurtarmaq içün küreşken USQniñ qırımtatar askerleri aqqında "Qarşılıq" fotoseriyası taqdim etildi.
Bu bediiy leyha mayıs ayında Temsilcilikte qırımtatar halqınıñ genotsid fedalarını añma künü arfesinde açıldı.
Hatırlatamız ki, orta küz ayınıñ 8-nde Riyğikogu (Estoniya parlamenti) tış işleri eyyetiniñ reisi Marko Mihkelson 54 mebus adından 1944 senesi sovet akimiyeti tarafından qırımtatar halqınıñ kütleviy sürgünliginiñ genotsid olaraq tanınması aqqında beyanat leyhasını işke tüşürmege yolladı.
Telegram, WhatsApp ve Facebookta Suspilne Qırım haberlerine abune oluñız