Ukraina, Türkiye ve qırımtatar halqınıñ vekilleri işğal etilgen Qırımda insan aqlarınıñ bozuluvından zarar körgen qırım siyasiy mabüsleriniñ qorantalarınıñ balalarına destek kösterilmesini muzakere ettiler.
Ukraina prezidentiniñ Qırım Muhtar Cumhuriyetindeki temsilciligi bunı bildirdi.
Temsilcilikniñ malümatına köre, tedbirde Türkiyeniñ baş cemaat ombudsmanı Şeref Malkoz, Ukraina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikov, Qırımtatar Milliy Meclisiniñ vekilleri, hususan Refat Çubarov, Nariman Celâl, Qırım Muhtar Cumhuriyeti ve Aqyar sakinleriniñ aqları vekâletlisi Elvin Kadırov ve hayriye teşkilâtlarınıñ vekilleri iştirak ettiler.
Körüşüv devamında iştirakçiler vaqtınca işğal etilgen Qırımda insan aqlarınıñ bozulması ve balalarğa, hususan ana-babası siyasiy mabüs olğanlarğa tesirini muzakere ettiler. İşğalci memuriyetniñ taqipleri sebebinden pek çoq bala ana-babasız yaşamağa mecbur olğanı qayd etildi.
Türkiyeniñ baş ombudsmanı Şeref Malkoz Türkiyeniñ siyasiy mabüslerniñ qorantalarına destek köstermek içün planlaştırılğan adımları aqqında aytıp berdi ve ukrain balalarına yardım kösterilgenini qayd etti. Aynı zamanda Denıs Çıstikov, işğal etilgen Qırımdan kelgen qorantalarğa qoltutuvnıñ müimligini qayd etti, şu cümleden, ukrain vesiqalarını elde etmege yardım, tasil aluv ve ruhiy destekniñ inkişafı, hususan halqara ortaqlarnı celp etüvnen bağlı.
Körüşüv, Qırımnıñ işğalci akimiyeti tarafından ana-babaları taqip etilgeni sebebinden ağır yaşayış şaraitine oğrağan balalarğa destek köstermek içün konkret teklifler muzakere etilüvinen soñuna yetti.
Telegram, WhatsApp ve Facebookta Suspilne Qırım haberlerine abune oluñız