Qırımtatar Leniye Umerova berim ayınıñ 13-nde nevbetteki deñişim çerçivesinde qaytarıldı. Onıñnen beraber 48 ukrainalı evge qayttı. Olar Ukraina Silâlı quvetleri, Milliy gvardiya, Milliy polis, Devlet sıñır hızmetiniñ askerleri ve vatandaşlardır.
Ukraina prezidenti Volodımır Zelenskıy Telegramda bunı bildirdi.
"Men pek quvandım, söznen ifade etip olamaycağım qadar sevindim. Ukraina bayrağını körgenime pek quvanam", — Leniyeniñ azat etilgen soñki ilk sözleri.
Ukraina Yuqarı Şurasınıñ insan aqları vekâletlisi Dmıtro Lubinets Telegramda qayd etkenine köre, umumen, tolu miqyaslı istilâ başlağanından berli Rusiye esirliginden 3 569 ukrainalı qaytarıldı. Berim ayınıñ 13-nde 56-ncı arbiy esir deñişimi olıp keçti.
"Azat etilgenler arasında Ukraina Qaramanı, arbiy ekim Viktor İvçuk ve hasta babasını ziyaret etmek içün ketkende ruslar tarafından esir alınğan Leniye Umerova bar. "Azovstal"nıñ qorçalayıcılarınıñ bir qısmı da azat etildi, — dep qayd etti o.
Aynı zamanda sabıq siyasiy mabüsniñ qardaşı Aziz Umerov Facebookta bu vaqianen bağlı teessuratlarını paylaştı.
"İnanılmaz haber, alâ daa inanılmay. Leniye evge ve azatlıqqa hoş keldiñiz. Bu vaqıt devamında yanımda olğan er keske teşekkürlerimni bildirem", — dep qayd etti o.
Umerovnıñ Suspilne Qırımğa bildirgenine köre, onıñ qız qardaşı ekimlerniñ teşkerüvine alıp ketile, soñra ise tuvğanlarınen körüşmek mümkün olacaq.
"O maña telefon etip, azatlıqta olğanını bildirdi! Şimdi olarnı ekimlerge alıp keteler, soñra onı körmek mümkün olacaq. Ana-babamnen laf ettim, olar da alâ daa inanmaylar!" — dedi o.
Leniye Umerova aqqında ne bilemiz
2022 senesi ilk qış ayından berli Rf akimiyeti, 25 yaşındaki qırımtatar Leniye Umerovanı qanunsız olaraq tuta edi. Oña qarşı bir qaç memuriy protokol tizdi. Birinci kere sanki vesiqalarını bermegen, bundan soñ sanki telefonını bermegen, bundan soñ da sanki "masadan çıqmağan ve qarşılıq köstergen".
Suspilne Qırım Leniyeniñ ağası Aziz Umerovnen laf etti. Rusiye tarafından ukrain pasportına saip olğanı ve rus pasportından red etkeni sebebinden maküm etilgen qardaşınıñ ikâyesini añlattı.
Qırım uquq qorçalayıcı gruppasınıñ başı Olha Skrıpnık, qırımtatar Leniye Umerovanıñ Rusiyedeki izolâtorda teqvif müddetiniñ uzutılmasınıñ sebeplerini añlattı. Bundan ğayrı, uquq qorçalayıcı, qadınnı işğalcilerden qurtarmağa ve evge qaytarmağa yardım etecek yollarnı bildirdi.
Quralaynıñ 5-inde Moskvadaki Lefortov rayon makemesi, ruslarnıñ Şimaliy Osetiyada 5 ayğa qanunsız olaraq tevqif etkeni qırımtatar Leniye Umerovanı epis etti. Leniye Umerovanıñ qorçalayıcıları, qorçalayıcı tedbirniñ miqdarını iddialaşmağa planlaştıralar.
İlk qış ayınıñ 18-inde Moskvadaki Lefortovo makemesi, qırımtatar Leniye Umerovanıñ qorçalayıcı tedbirniñ uzatılması aqqında taqiqatçınıñ ricasını baqtı. Qırımtatar qadınnı "casuslıq"ta (RF CQniñ 276. maddesi) qabaatlandı. Onıñ tevqif müddetini daa eki ayğa uzatıldı.
2024 senesi kiçik aynıñ 27-sinde rusiye makemesi, qorçalayıcı tarafnıñ Leniye Umerovanıñ tevqif müddetini uzatqan qararğa şikâyetnamesini red etti.
Telegram ve Facebookta Suspilne Qırım haberlerine abune oluñız