Qırımtatar Vikipediyasına bağışlanğan marafon çerçivesinde iştirakçiler 517 maqale yazdılar ve yañarttılar. Bu teşebbüs qırımtatar tili ve medeniyetiniñ inkişafı ve saqlanuvını közde tuta.
Marafonnıñ teşkilâtçıları olğan "Vikimedia Ukraina" cemaat teşkilâtı Facebook saifesinde bu aqqında haber etti.
Marafonnıñ iştirakçileri Vikipediyanı qırımtatarlarnıñ tarihı, medeniyeti, ananeleri ve zemaneviy yaşayışınen bağlı çeşit mevzularda yañı malümatnen toldurdılar. Ananeviy qırımtatar yaraşığı, Lvivdeki qırımtatar merkezi, XX. asırnıñ başındaki qırımtatar oca Asan Aciumerov, Qırım astrofizik observatoriyası ve ilâhre aqqında yañı maqaleler peyda oldı.
"Bugün bu yılnıñ marafon neticelerini ilân etmege quvanamız. O vaqıt devamında: 517 maqale yaratıldı ya da bayağı yahşılaştırıldı; 14 iştirakçi iştirak etti; bir vebinar keçirildi; Lvivde sekiz insandan ibaret olğan offlayn körüşüv teşkil etildi. Bu qırımtatar Vikipediasınıñ inkişafına büyük bir isse!" — dep Vikimedia Ukraina" haber etti.
Qırımtatar "Vikipediyası" 16 yıldan çoq yaşay ve 30 biñge yaqın maqalesi bar. 2021 senesi keçirilgen birinci marafonda qırımtatar tilinde 300-ge yaqın maqale azırlandı.
Telegram ve Facebookta Suspilne Qırım haberlerine abune oluñız