Kıyivniñ Svâtoşıno rayon makemesi, RF tarafından yarımadanıñ işğali başlağan soñ antını bozıp, Rusiye tarafından qanunsız şekilde teşkil etilgen makeme organında vazife alğan Aqmescit rayon makemesiniñ sabıq makemecisini ğıyabiy şekilde maküm etti.
Jurnalist taqiqatları merkezi (JTM), arman ayınıñ 28-nde çıqarılğan ükümge atfı etip bunı bildirdi.
Dava malümatına köre, 2014 senesi baarde maküm etilgen qadın işğalcilernen işbirlik tuttı ve "Qırım Cumhuriyeti ve federal emiyeti olğan Aqyar şeerinde çalışqan makemelerniñ makemecileriniñ vazifelerini eda etken vatandaşlar" vazifesinde çalışmağa devam etti.
2014 senesi ilk qış ayında Rusiye Federatsiyasınıñ prezidentiniñ emrinen Qırım Cumhuriyetiniñ işğal etilgen Aqmescit rayon makemesine "makemeci" olaraq tayinlendi.
Taqiqat, maküm etilgen qadın Rusiye Federatsiyasına ve onıñ vekillerine Qırım MCniñ makemeleriniñ Rusiye qanunlarına esaslanıp adaletni yerine ketirmge, işğalli akimiyet organlarına yarımada işğaline qarşı çıqqan Ukraina vatandaşlarınıñ itirazlarını bastırmağa ve qoruv altında bulunğan şahıslarnı taqip etüv ameliyatını amelge keçirmege yardım etkenini qayd etti.
JTM qayd etti ki, maküm etilgen qadın 2010 senesi oraq ayınıñ 13-nde 5 sene müddetinen Aqmescit rayon makemesiniñ makemecisi vazifesine tayinlendi. 2015 senesi boş aynıñ 17-nde Yuqarı adalet şurası Ukraina makemecileriniñ Yuqarı kvalifikatsiya eyyetine muracaat etip, makemeciniñ intizam ihtarı ve ant ihtarı bozğanını teşkermege rica etti. Bir buçuq seneden soñ, 2017 senesi mayısnıñ 11-nde, Yuqarı adalet şurası maküm etilgenni esas nizam bozğanı sebebinden vazifesinden boşattı.
Qırım MC ve Aqyar şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana.
Aynı zamanda adam tutulğan vaqıttan berli ceza müddeti başlap sayıla.
Telegram ve Facebookta Suspilne Qırım haberlerine abune oluñız