"Hizb ut-Tahrir davası" çerçivesinde 12 senege maküm etilgen qırım siyasiy mabüsi Eskender Abdulganiev Kemerovo vilâyetindeki 41. müstemlekeden Kemerovo şeerindeki 29. müstemlekege etap etildi.
Onıñ anası Emine Abdulganieva "Qırım birdemligine" bunı bildirdi.
5 ay devamında qırımtatar adamı 41. müstemlekeniñ ŞİZOsında bulunğan edi. Yolbaşçıları vaqtınca müdir vazifesini yapqan Dmıtro Jılâkov ve havfsızlıq ve operativ iş temsilcisiniñ muavini Andriy Sıdorov olğan mahsus eyyet onı o yerge yolladı.
Bu qarar, onıñ "daimiy bozuvlarğa oğrağan qabaatlı cinayetçi" statusına esaslanıp alındı. Onı sıq-sıq kamerada qapata ediler, anda tutuluv şaraiti sebebinden memnün degil edi.
Siyasiy mabüs, beş ay devamında — kiçik aynıñ 14-nden bozarğan aynıñ 21. kününe qadar beş künlik teneffüsnen (o zaman onı kameralı odada qapattılar) ŞİZOda tutuldı.
Bundan ğayrı, Abdulganiev Kemerovo vilâyetiniñ insan aqları temsilcisine ve Cemaat közetüv eyyetiniñ vekillerine muracaat etmege tırıştı, em de imamnen körüşmege istegenini bildirdi, amma onıñ ricası cevapsız qaldı.
Bundan soñ onı Kemerovodaki başqa müstemlekege alıp ketirdiler, onıñ anası Emine Abdulganievanıñ aytqanına köre, bu Rusiye vatandaşlığını qabul etmege red etkeni içün oldı.
"Men bellesem, bu sebepten onı sıq-sıq taqip ete ediler ve o, bu sebepten daima izolâtorda qala edi. Tünevin, oraq ayınıñ 9-nda, 29-ncı müstemlekede kerçekten olğanını bildirgen mektübini aldıq. Anda (41. müstemlekede) daa sert şarait bar, Vladimir apishanesinde olğanı kibi. O, lagerde degil, kamerada közetile. Saba saat 5-te yataqlarını köterip, yataqlarını alıp keteler, ve bütün kün, aqşam saat 10-ğa qadar, oğlum ayaqlarında tura. Yürüş — tek bir saatlik yürüş odasıdır. Anda küneş ışığı damdaki dar bir boşluqtan aqa. Añlağanıma köre, 41-inci müstemlekedeki şarait ŞİZOdakilerden da yaramay", — dep Emine Abdulganieva añlattı.
Eskender Abdulganiev aqqında ne bilemiz
— 2020 senesi boş aynıñ 3. künü Rıstıv-na-Donudaki Cenübiy bölge arbiy makemesi, "Hizb ut-Tahrir davası"nıñ Qurman gruppasınıñ mabüsleri Rustem Emiruseinovnı 17 senege, Eskender Abdılganievni 12 senege ve Arsen Abhayirovnı 13 senege maküm etti. Birinci üç sene devamında olarnı eñ sert apis cezalarına maküm etti.
— 2021 senesi boş aynıñ 1. künü Apellâtsiya arbiy makemesi, Cenübiy bölge arbiy makemesiniñ qararını tasdıqladı. Tutulğanlarnıñ episi Rusiyede terroristik olaraq tanılğan, amma bir çoq memlekette, şu cümleden Ukrainada, sıñırsız faaliyet etken Hizb ut-Tahrir islâm siyasiy firqasında iştirak etkeninde qabaatlandı.
— Abdulganiev üç seneden çoq apiste buluna, amma Rusiye makemesiniñ qararına köre, siyasiy mabüs üç sene apiste qalmalı, soñ ise müstemlekege onı yollamalılar.
— "Hizb ut-Tahrir davası"nıñ Qurman gruppasınıñ mabüsleri Arsen Abhairov, Rustem Emiruseinov ve Eskender Abdulganiev makeme tarafından belgilengen müddetten çoq apishanede tutula. Aman-aman bir sene evel olarnı sert rejimli müstemlege avuştırmaq kerek ediler.
— Saban ayında Rusiyeniñ Vladimir şeeridndeki müstemlekede Abdulganiev Rusiye vatandaşlığını qabul etmege mecbur etildi. O, bunı red etti, bundan soñ onı apishaneniñ tamir bölügine yerleştirdiler.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir — islâm siyasiy firqasıdır. Rusiyede bu teşkilât terror teşkilâtı olaraq tanındı, onıñ iştirakçileri taqip etildi. İştirakçilerni "anayasağa qarşı faaliyet"te ve "dünya halifeligini" meydanğa ketirmek ıntıluvında qabaatlaylar. Aynı zamanda Hizb ut-Tahrir devletlerniñ çoqusında, şu cümleden, Ukrainada, serbest şekilde areket ete.
Telegram ve Facebookta Suspilne Qırım haberlerine abune oluñız