Qırımtatar cemaat erbapları, Ukraina Mudafaa quvetlerini destek etmek ve cebege yaqın, işğal etilgen topraqlardaki insanlarğa gumanitar yardım bermek içün "Qırım cebesi" birleşken teşebbüsini başlattılar.
Suspilne Qırım mühbiri bu aqqında haber berdi.
"Qırım cebesi" teşebbüsiniñ idarecilerinden biri Snaver Seithalilev bildirdi ki, mezkür teşebbüsniñ maqsadı, Ukrainanıñ ğalebesini yaqınlaştırmaq ve Qırımnı işğalden azat etmektir. O, toplanğan ve Mudafaa Quvetlerine berilgen yardımnı miqyaslandırmağa yönelecektir.
Qırım Musulmanları Diniy İdaresiniñ müftisi Ayder Rustamov añlattı ki, 2014 senesinden berli "Qırım cebesi"nde iştirak ete. Şu anda Qırım Milliy Varlıq Fondunıñ esasında Meclinen birlikte Diniy İdare, "Ülkeni aşatamız" hayriye levhasını cebege yaqın topraqlarda keçire ve mobil tibbiy ameliyathaneni açmağa planlaştıra.
"Bizim maqsadımız, birinciden cebege yaqın topraqlarda tedaviylemek, aş bermek ve ruhiy tarzda baqmaqtır", – dep tafsilâtlıca añlattı o.
Bundan ğayrı, "Qırım cebesi" çerçivesinde göñülliler, acele yardım maşnaları ve başqa maşnalarnı bereler. Leyhağa qatılğan hayriye fondları, qorçalayıcılarğa 96 maşna yolladılar, cebege yaqın topraqlarda vatandaşlarnı aşayt mahsulatı ve ilk kerekli eşyalarnen temin eteler.
Qırımtatar Milliy Meclisiniñ başı Refat Çubarovnıñ sözlerine köre, bu teşebbüs, 2014 senesi kiçik aynıñ 26-sinde Qırım işğal etilgen vaqıt başlağan küreşniñ devamıdır.
"Bu, qırımtatarlarnıñ vekâletli organı olğan Mesclis, Qırım Musulmanları Diniy İdaresi ve qırımtatar içtimaiy teşkilâtları, göñülliler, medeniyet erbapları kibi qırımtatar institutsiyalarınıñ birleşken teşebbüsidir", – dep añlattı o.
Çubarov qayd etti ki, askerler, cebege yaqın ve vaqtınca işğal etilgen ukrain topraqlarınıñ sakinleriniñ muracaatları, tamam bu platformağa yollanacaqtır.
"Bugünde episi bu, bir platformada toplanacaqtır. Mında toplanma alını körem – bizim imkânlarımız, ğayretlerimiz artalar. Qırım cebesiniñ itibarını qazana bilirsek, yardım ete bilecel sponsorlar ve donorlarnıñ sayısı artar. İtibar olsa. Bunıñ içün küreşmelimiz", – dep qayd etti o.
Teşebbüsniñ idarecilerinden biri Lenur Mambetovnıñ añlatqanına köre, tek maliyeviy degil, malümat ta saasına qatılmağa istegenler içün leyhanıñ saytında malümatnen ayrı bir bölük bar.
"Bizge yardım ete bilgen ve bunı yapmağa istegen er kesni davem etemiz ve Qırımnı serbest körmege istegenlerniñ qatılmaları, büyük bir platformanıñ olması ve er kesniñ tamam Qırımda bu cenkni bitirmege istegen insanlarnıñ ne qadar çoq olğanını körmesi müimdir", – dep Mambetov añlattı.
Bundan ğayrı, leyhanıñ planlarında ukrain askerlerini qorçalayıcı urba ve silânen tamin etmek ve vatandaşlarnı tahliye etmektir.
Telegram, Viber ve Facebookta Suspilne Qırım haberlerine abune oluñız