Перейти до основного змісту
Ukrayinada «Qırımtatar tili imlâsı» neşir etildi. Getty Images

Ukrayinada «Qırımtatar tili imlâsı» eki kitapta — qırımtatar ve ukrayin tillerinde — basılıp çıqtı. Qırımtatar Milliy Meclisi nushalarnı evelden berilgen arizalarğa köre tarqatacaq, oquv yurtlarına, kitaphanelerge, tilşınaslarğa ve tilni qullanğan diger şahıslarğa ögünlik berecek.

Boş aynıñ 13-nde Facebookta Qırımtatar Milliy Meclisiniñ Reisi Refat Çubarov bunı bildirdi.

««Qırımtatar tili imlâsı» tam neşiri bastırılğanını bildiremiz. Oña Qırımtatar tili meseleleri Milliy eyyeti tarafından 2024 senesi boş aynıñ 4-nde alğışlanğan ve Ukrayina Nazirler Kabinetiniñ 2025 senesi çeçek ayınıñ 4-ndeki 307-r nomeralı emri ile tasdıqlanğan imlâ metini kirdi. Tam neşirde eki kitap bar — qırımtatar ve ukrayin tillerinde — olar meşur qırımtatar sanatkâr Rustem Skibin tarafından dizayn etilgen nazik qutuda yerleştirilgen», — dep yazdı o.

Neşirniñ sıñırlı olğanını köz ögüne alıp, Qırımtatar Milliy Meclisi nushalarnıñ tarqatılmasını evelden berilgen arizalar-anketalarğa köre yapacaq.

Ögünlik aliy, umumiy orta ve mektepke qadar oquv yurtlarına, kitaphanelerge, muallimlerge, tilşınaslarğa, filolog-talebelerge, tercimanlarğa, gazetacılarğa ve qırımtatar tilini öz ameliy faaliyetinde doğrudan-doğru qullanğan içtimaiy teşkilâtlarğa berilecek.

«Mümkün alıcılarnı — em teşkilâtlarnı, em de şahıslarnı — formanı toldurmağa rica etemiz. Qayd etemiz ki, anketa-ariza bermek nusha almaq içün avtomatik esas degildir. Qararlar bütün alınğan muracaatlar baqılacaq soñ qabul etilecek, evelâ neşirni qullanmaqqa aqiqiy ihtiyacnı tasdıqlağanlar qanaatlandırılacaq. Qırımtatar Milliy Meclisi ayrıca Qırımtatar tili imlâsı metininiñ eñ tez zamanda ihtisas internet-resurslarında yerleştirilmesine yardım etecek», — dep qoştı Çubarov.

Telegram, WhatsApp, Facebook, TikTok ve YouTubede Suspilne Qırım haberlerine abune oluñız

Bizni Google Haberlerinde oqumaq içün Suspilne Qırımnı saylanğan mevzularda saylañız

Топ дня
Вибір редакції