Halqara uquq qorçalayıcı teşkilât Freedom House Rusiye mahkemesi tarafından 14 senege mahküm etilgen qırımtatar uquq qorçalayıcısı ve jurnalisti Server Mustafayevniñ azat etilmesini talap etmege çağırdı.
Ukrayinanıñ AQŞdaki eski elçisi Oksana Markarova, teşkilâtnıñ idare müdiri Ceymi Flay ile körüşkenden soñ onıñ aqqında hatırlattı.
Markarova Freedom House idare müdiri Ceymi Flay ile birlikte çekilgen fotonı neşir etti. Onıñ sözlerine köre, olar ukrayin siyasiy mabüsleriniñ, hususan Vladıslav Yesıpenko, Nariman Celâl, Maksım Butkevıç ve digerleriniñ azat etilmesi meselesinde çoqtan işbirlik yapalar.
«Bizim bütün körüşüvlerimiz, qaysı mevzuda olsa da, er zaman bizim siyasiy mabüslerimizni azat etüv boyunca işke de ait edi», — dep yazdı Markarova.
O qayd etti ki, Ceymi Flay ile Vaşingtonda Ukrayina Evi iştirakinen Ukrayinada ortaq tedbirlerni devam ettirmege planlaştıralar. Hususan, Rusiye tarafından qanunsız şekilde esirlikte tutulğan vatandaşlarğa diqqatnı celp etmege.
Bu sefer olar Server Mustafayevni — qırımtatar uquq qorçalayıcısı, jurnalisti ve «Qırım birdemligi» ictimaiy areketiniñ koordinatorını — hatırlattılar. Rusiye mahkemesi onı «terrorizm» davasında sert rejimli müstemlekede 14 senege mahküm etti.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız