İlk qış ayınıñ 7-nde Londonda keçirilecek Halqara Qırım platformasınıñ beşinci parlament sammitinde 60-tan ziyade parlament delegatsiya iştirak etecek.
Orta küz ayınıñ 22-nde Facebookta Qırımtatar Milliy Meclisiniñ Reisi Refat Çubarov Büyük Britaniya işlerinde muvaqqat vekâletli Şarlotta Süren ile körüşüv neticesinde bunı bildirdi.
«Qırım platforması iştirakçileriniñ terkibine kirgen Meclis azaları, onıñ manalı toluvı boyunca bir qaç teklifini seslendirdiler», — dep qayd etti Çubarov.
Onıñ aytqanına köre, Londonda keçirilecek sammit Qırımnı işğalden qurtaruv siyasetini ileriletmek ve Ukrayinağa cenkniñ bitirilmesiniñ adaletsiz şartlarını qoymaq ıntıluvlarına qarşılıq köstermek içün müim halqara meydançıq olaraq sayıla.
Muzakereler vaqtında taraflar Rusiye-Ukrayina cenki, işğal etilgen Qırımda insan aqları vaziyeti ve halqara forumğa azırlanuvnı muzakere ettiler.
«Meclis vekilleri qayd ettiler ki, Ukrayina ve qırımtatar halqı içün eki manalı añlamlar yoq ve olamaz: Qırımğa dair topraq teslimleri aqqında laflar ya da onıñ statusı aqqında qararnıñ uzaq kelecekke qaldırılması barışıqnen iç bir alâqası yoq. Qırımtatar halqı içün böyle bir stsenariy onıñ barlığına ve soñunace yoq etilmesine doğrudan-doğru telüke doğuracaq. Çünki Moskvanıñ açıq maqsadı budır — tamır qırımtatar halqını tuvğan toprağından quvıp, Stalin ve sovet sisteması XX asırda yapıp olamağanını bitirmektir», — dedi Çubarov.
Körüşüv iştirakçileri Qırım siyasiy mabüsleriniñ vaziyeti ve işğal etilgen yarımadada repressiyalarğa ayrı diqqat ayırdılar. Körüşüv devamında Meclis, Qırım sakinleriniñ taqip etilmesini toqtatmaq ve telükesizligini temin etmek içün yekâne yol yarımadanıñ bütünley işğalden azat etilmesi ve Ukrayinanıñ suverenitetiniñ ğayrıdan tiklenmesi olğanını qayd etti.
Aynı zamanda Britaniya tarafı Ukrayinanıñ topraq bütünligine qol tutqanını tasdıqladı, Qırım ve bütün diger VİETvaqtınca işğal etilgen topraqlar halqara uquq qaidelerine köre azat etilmek kerek olğanını qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız