Bağçasaraylı altı qırımtatar «Hizb ut-Tahrir» davası çerçivesinde sert rejimli müstemlekede 15-19 yılğa üküm etildi. Bu qararlarnıñ artından ana-babasız, aqaylar ve oğullarsız qalğan qorantalar, ana-babasız qalğan balalar ve eñ yaqınlarnıñ destegini coyğan qart ana-babalar kele.
Rostov-na-Donudaki Cenübiy bölge arbiy mahkemesiniñ «Hizb ut-Tahrir davası»nıñ beşinci Bağçasaray gruppasınıñ mabüslerine çıqarğan ükümini izaatlap, Qırımtatar Milliy Meclisiniñ Reisi Refat Çubarov bunı qayd etti.
Çubarovnıñ aytqanına köre, bu, Bağçasaraylı qırımtatarlarnıñ işbu dava çerçivesinde taqip etilgen beşinci gruppasıdır. Umumen «terror teşkilâtlarında iştirak etüv» davalarında Rusiye işğalli mahkemeleri 120-den ziyade qırımtatarnı mahküm etti.
«Altı adam: 15, 18, 19 yıl... Rusiye cezalandırıcı maşnası içün bular sadece ceza raqamlarıdır. Balalar içün babasız balalıq yılları. Qadın içün yalıñızlıq ve qoranta içün küreş yılları», — dep yazdı Meclis Reisi.
O, mabüslerniñ qart ana-babalarına diqqat çekti, olar oğullarınıñ desteginden marum qalalar, em de apishaneniñ bütün qoranta azaları içün aqibetlerini qayd etti.
Çubarov ükümlerni işğal etilgen Qırımda Rusiye siyasetiniñ ifadesi olaraq tanıdı, onıñ aytqanına köre, bularnıñ arasında uydurılğan qabaatlavlar, uzun apis müddetleri, fikirleri ve birdemligi içün taqipler.
«İşğal etilgen Qırımda Rusiyeniñ vahşiy yüzü böyle: uydurılğan qabaatlavlar, çoq yıllıq apis cezaları, fikir ve birdemlik içün taqip, cemiyetni qorqutmaq ve qırımtatarlarnıñ qarşılığını bozmaq ıntıluvları», — dep qayd etti o.
Meclis Reisi, iç bir üküm qırımtatar halqınıñ tuvğan toprağı, menlik ve serbestlik aqqını lâğu etmeycegini bildirdi. O, halqara toplulıqnı da taqipke lâqayt qalmamağa çağırdı.
«Amma dünya bu cezalarğa alışıp olamay. Sessizlik sadece cellârlarnıñ ellerini aça», — dep qoştı Çubarov.
Hatırlatamız ki, Rusiyeniñ Rostov-na-Donu şeerindeki Cenübiy bölge arbiy mahkemesi «Hizb ut-Tahrir davası»nıñ beşinci Bağçasaray gruppasınıñ altı mabüsini mahküm etti. Olar 15 yıldan 19 yılğa qadar sert rejimli müstemlekege mahküm etildi. Qırımtatarlar oturışqa video bağı vastasınen qatnadılar. Mahkeme qararından evel olar, diniy ve milliy sebeplerden taqip etilgenini bildirdiler.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2023 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
2024 senesi orta küz ayınıñ 21-nde Rostov-na-Donu Cenübiy bölgesiniñ arbiy makemesi, yañı deliller olmağanına baqmadan, Abdulmecit Seitumerov ve beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
2025 senesi orta küz ayında rusiye mahkemesi, SİZOda gigyenasızlıq ve hastaqlılarınıñ kirgenleşkeni aqqında delillerge baqmadan, bu gruppanıñ altı qırımtatar mabüsiniñ apis müddetini 2026 senesi kiçik aynıñ 23-üne qadar devam ettirdi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız