Bir qaç künden berli işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) çöp çıqarılmay, bu ise şeerniñ çeşit rayonlarında tabiiy çöplük obalarınıñ peyda olması ve sıçavullarnen bağlı şikâyetlerniñ peyda olmasınıñ sebebi oldı. Sebep işğalli kommunal hızmetleri arasında çatışma oldı. «Temiz şeer» şirketiniñ esapları blok etilgen soñ, çöplük maşnaları marşrutlarğa çıqmay.
Orta küz ayınıñ 20-nde Telegramda «Sarı şerit» cemaat areketiniñ faalcileri bunı bildirdiler.
Onıñ malümatına köre, «Temiz şeer» işğalli şirketi, Kreml kontrol etken «Blağoustriy» müessisesi esaplarını blok etken soñ, çöplük çıqarılmasını toqtattı. Bu sebepten çöplük maşnaları marşrutqa çıqmay, ve konteyner meydançıqlarında çöplük toplanıp başladı.
Faalcilerniñ aytqanlarına köre, «Temiz şeer» hadimleri de endi 4 yıl devamında aylıqlarnıñ arttırılmamasından şikâyet eteler ve orta küz ayı içün para berilmemesinden qorqalar. Buña baqmadan, olar aftada altı kün sekiz saat çalışalar.
«Razvojayev çöplükni çıqarmağa vade ete, lâkin meseleni çezmek yerine işğalli memurlar mesüliyetni biri-birine yükleyler, şeer ise çöplüknen tolu qala», — qayd etildi haberde.
Hatırlatamız ki, yerli sakinlerniñ bildirgenlerine köre, eñ qıyın vaziyet Ostrâkov caddesinde, «Blağodatnıy» mesken kompleksinde, Gagarin rayonında, Flagmanska soqağında ve Maksımova Daça rayonında peyda oldı. İnsanlar şunı qayd eteler ki, çöpni bir qaç kün devamında çıqarmaylar, amma sakinler bu hızmet içün para tölemege devam eteler.
Sevastopol «gubernatorı» Mihail Razvojayev meseleni tanıdı ve çöp çıqarılmasını yaqın vaqıtta ğayrıdan tikleyceklerini bildirdi. Aynı vaqıtta o, öz «müavini»ne işten tenbi bildirdi, diger memurlar ise vaziyetni yaqarlıq fiyatlarınıñ deñişmesi ve kommunal müessiselerinde para olmağanı ile añlatalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız