Qırımnıñ Qurman rayonında işğalciler balalarğa ateşnen oğraşmağa ögreteler. Mekteplerden birinde AK-74M modernizatsiya etilgen Kalaşnikov avtomatını parçalav ve birleştirmege dersleri keçirildi.
Orta küz ayınıñ 12-nde Telegramda işğalli «Krımpatriottsentr» bu aqqında haber etti.
«Krasnogvardiysk rayonınıñ (Qırman rayonınıñ — muar.) "Muskatnıyvska mektebi"nde "Şimaliy-şarqiy avangard» zona merkeziniñ qoşma tasil ocası Mıhaylo Volkov FVNFevqulâde vaziyetler nazirligi kadetleri içün ateş azırlığı esasları derslerini keçirdi. «AK-74Mmodernizatsiya etilgen Kalaşnikov avtomatıniñ taktik-tehnikiy hususiyetleri ve qurulışı« mevzusı çerçivesinde kadetler silânıñ yaratıluv tarihına daldılar, onıñ cenk hususiyetleri ve qurulışını tafsilâtlıca ögrendiler. Hususan, ameliy beceriklerni ögrenüvge diqqat ayırıldı: ocalarnıñ rehberligi altında talebeler avtomatnı qısmen parçalap, soñra da birleştirmege ögrendiler», — dep qayd etildi haberde.
Mıhaylo Volkov Kanada, AB ve Büyük Britaniya tarafından sanktsiyalarğa oğratılğan «Avangard» arbiy-vatanperver merkezini temsil ete. Avropa Birliginiñ malümatına köre, bu merkezde işğal etilgen topraqlardan kelgen balalar içün Rusiyege qol tutqan teşviqat ve arbiy azırlıq elementleri ile programmalar teşkil etile.
Hatırlatamız ki, orta küz ayınıñ 8-nde, 2026 senesi, AQŞ Devlet departamenti 2026 senesiniñ insan ticaretinen bağlı esabatını derc etti. Anda Rusiyeniñ işğal etilgen ukrayin topraqlarında balalarğa qarşı yapqan cinayetleri aqqında söz yürsetile — olarnı haber berici olaraq qullanuv ve RF ordusında hızmet etmek içün azırlav.
«Nezaretçiler, (RF — muar.) havfsızlıq quvetleri ukrayin balalarını muhbir olaraq qullanğanını, em de Rusiye balalarını, şu cümleden öksüz ve saqat balalarnı, Ukrayinada cenkleşken Rusiye askerleri içün urba ve bağ tikkenlerini, em de taktik yükler, köçürilgen ocalar ve çuqur çıraqlarını yapqanlarını bildirgen edi. Akimiyet Rusiye tarafından işğal etilgen Ukrayina toprağında Rusiye ve ukrayin balalarını Rusiye Silâlı quvetlerinde ola bilecek askerlik içün ögretmege tırışa, bu ise olarnıñ insan ticaretine oğraşmaq telükesini arttıra», — dep qayd etildi vesiqada.
İnsan aqları Avropa mahkemesi (İAAM) Qırım işğal etilgen soñ Rusiye tarafından öz vatandaşları olaraq tanılğan ve evlâtlıqqa aluv sistemasına kirsetilgen on Qırımlı öksüz balanıñ davasını çezmege tırışa. Bugün bu gençler 13 yaşından 17 yaşına qadar. Uquq qorçalayıcılarnıñ fikrinve, olarnıñ bir qısmı öz tamırlarını, adlarını ve Ukrayina vatandaşları olğanını bilmey.
İşğal vaqtında Qırımda devlet imayesi altında aman-aman 5 biñ bala bulunsa da, dava içün tek on bala qayd etildi. Uquq qorçalayıcılarnıñ aytqanlarına köre, Rusiye olarnıñ taqdirleri aqqında malümatnı gizley, evlâtlıqqa alğanlar ise balalarnıñ şahsiy malümatını deñiştirgen ediler. Ukrayina tarafı İnsan aqları Avropa mahkemesiniñ bala aqlarınıñ bozulğanını tanımasını ve kelecekte olarnıñ kerçek kimligini ğayrıdan tiklemek içün uquqiy sebepler yaratmasını bekley. Tafsilâtlıca — Suspilne Qırım maqalesinde oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız