Finlandiya yazıcısı, jurnalisti ve vesiqalı ressamı Elina Hirvonen bir qaç ağır hastalığı olğan qırımtatar siyasiy mabüsi Tofik Abdulaziyevniñ acele azat etilmesini talap etti.
O, Facebookta bu aqqında yazdı.
Onıñ aytqanına köre, ilk küz ayınıñ 3-nde olıp keçken mahkeme oturışından soñ Abdulgaziyev bütün kün apis maşnasında aşsız ve suvsız tutuldı, ve oña acele yardım çağırılmadı, amma, Hirvonenniñ fikirince, o, mikroinsult keçirgen ola bile.
O, yazdan berli siyasiy mabüsler içün mentorlıq programması çerçivesinde Abdulgaziyevniñ mentorı olğanını qayd etti.
Yazıcınıñ aytqanına köre, 2019 senesi qırımtatar faalcisi ve babası Tofik Abdulgaziyev 12 yılğa üküm etildi. Hirvonenniñ qayd etkenine köre, o, verem, yürek hastalığı, şeker hastalığı ve miy şişesi hastasıdır.
«İlk küz ayınıñ 3-nde mahkeme oturışından soñ onı bütün kün devamında apis maşnasında aşsız ve suvsız qaldırdılar. O, mikroinsult keçirgen kibi körüne, amma acele yardım çağırılmadı», — dep yazdı Hirvonen.
O şunı da qayd etti ki, siyasiy mabüslerge mentorlıq, olar unutılmağanlarını, diger dünya ise — olar yaşamağa devam etkenlerini hatırlatmaq kerek.
«Men Tofikniñ deral azat etilmesini talap etem», — dedi Hirvonen.
Bundan da ğayrı, yazıcı halqara toplulıqnı Kremlge Rusiye tarafından tutulğan siyasiy mabüslerni ve vatandaşlarnı azat etmesi içün basqı quvetleştirmesine çağırdı. Onıñ aytqanına köre, 16 biñden ziyade insan aqqında söz yürsetile, çoqusı izolâtsiyada buluna.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız