Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakini Vitaliy Kuşçenkoğa devlet hainliginde şübe bildirildi. UHHUkrayina Havfsızlıq hızmetiniñ taqiqatçıları 2014 senesi Rusiyege Qırımnı işğal etmege yardım etkenini ve Rusiye istilâsından soñ Herson vilâyetinde ruslarnıñ qanunsız silâlı birleşmesine qoşulğanını qayd ettiler.
Baş prokurornıñ saytında devlet hainligi aqqında şübe malümat yazıldı.
«Ukrayina vatandaşı Kuşçenko Vitaliy Volodımırovıç, Ukraiynada üküm sürgen akimiyetke nisbeten şahsiy duşmanlığı sebebinden, çetel devletke Ukrayinağa qarşı Ukrayina topraqlarınıñ ilhaqı ve qanunsız işğali ile bağlı bozuv faaliyetini alıp barmaqta yardım etip, Ukrayina suverenitetine, topraq bütünligine ve toqunılmazlığına zarar ketirmek maqsadınen, Qırım Muhtar Cumhuriyetiniñ Sevastopol şeerinde bulunıp, öz isteginen RF tarafından Sevastopolda teşkil etilgen belgilenmegen qanunsız silâlı teşkilâtqa qoşuldı. Qırım Muhtar Cumhuriyetiniñ işğalinde RFa yardım etmek maqsadınen, onıñ erkânında faal iştirak etti, bu sebepten işğalli memuriyetniñ qaramanı, "Qırımnıñ qaytarılması içün" medali ve "Sevastopolnıñ 3-nci mudafaası içün" hatıra nişanı ile taqdirlendi», — dep qayd etildi qabaatlav metninde.
Tahqiqat malümatına köre, Rusiyeniñ Ukrayinağa istilâsından soñ şübelengen adam vaqtınca işğal etilgen Herson vilâyetinde bulunıp, Rusiye Federatsiyasınıñ silâlı birleşmesi olğan «Rusiye göñülli ücüm bölügine (Vasıl Margelov adına batalyon)» qoşuldı.
UHH, Kuşçenkonı devlet hainligiUkrayina CQniñ 111-nci maddesiniñ 1-nci qısmınde qabaatlay. O, 12 yıldan 15 yılğa qadar azatlıqtan marum etüv ve bütün mal-mülküniñ musadere etilmesine üküm etile bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız