Qırımlı siyasiy mabüs Oleksandra Striletsniñ 1,5 yaşında qızı vefat etti. Qızçıq 530 gramm ağırlığında prematür doğdı ve doğğanından berli aqcigerlerni suniy avalandıruvnen reanimatsiyada edi.
«Nova gazeta» bu aqqında yaza.
O vaqıt eki çağına yetmegen balası olğan Oleksandra Strilets 2026 senesi arman ayında Aqyarnıñ (Sevastopolnıñ) işğalci mahkemesi tarafından «devlet hainligi» davasında 12 yıl apis cezasına mahküm etildi. Onıñ anası Viktoriya da böyle bir ceza aldı, o ise çoqlu skleroz hastası.
Rusiye uquq qoruyıcılarınıñ malümatına köre, Oleksandra ve anası işğal etilgen Qırımda Rusiye ordusınıñ obyektlerini fotoğa çeke ve bu malümatnı Ukrayina mahsus hızmetlerine bere ediler. İşğalci mahkeme Oleksandranıñ davasını bir oturışuvda baqıp çıqtı.
Yañı doğğan qızınıñ sağlıq vaziyeti sebebinden «mahkeme ögündeki tahqiqat» vaqtında Oleksandra SİZOğa yiberilmedi — oña hastahanede bala ile beraber bulunmağa izin berildi.
O, üküm çıqarılmadan evel, qızı içün devamlı nezaret kerek olğanı içün, apis müddetini uzatmağa rica etti. Tibbiy mütehassıslar, balanıñ sağlıq vaziyeti ve anasınıñ bulunması kerek olğanını yazıp tasdıqladılar. Bunen beraber, mahkeme onıñ muracaatını qanaatlendirmedi. Apellâtsion mahkemesi de qararını deñiştirmedi.
Bundan soñ Oleksandra Strilets evinden 2,2 biñ kilometr uzaqlığında Rusiyeniñ Çuvaşiya vilâyetinde Kozlovka şeerindeki №5 qadın apishanesine ketirildi.
Balaları ile aqayı Maksim qaldı. 2026 senesi berim ayınıñ 10-nda Lera hastahaneden çıqarıldı ve ilk sefer evge qayttı. Ertesi künü saba qızçıq vefat etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız