Ruslar RFnıñ Krasnoyarsk vilâyetindeki Minusinsk apishanesinde Qırım siyasiy mabüsi Oleksandr Sizikovğa mektüp ve poşta kartlarını bermeyler ve anasına telefon etmege yasaq eteler. Onı arman ayında müstemlekege avuştırmaq kerek olsa da, memuriyet onı qara qış ayında keçirmege planlaştıra.
«Oleksandr Sizikovğa qol tutuv» Telegram kanalınıñ göñüllileri bunı bildirdiler.
Kanalda siyasiy mabüsniñ advokatınen körüşüvi aqqında yazıla. İlk küz ayınıñ 7-nde yazğan mektübinden belli olğanı kibi, ruslar onı evel şikâyet etken şaraitlerde apishanede tutmağa devam eteler.
Mektüpte Oleksandr Sizikov tarif ete ki, arman ayında ruslar onı anasına telefon etmek imkânından marum qaldırdılar. Şimdi o, ilk küz ayında onıñnen qonuşa bileceginden emin olmay.
«Menim içün er şey aynı. Aynı bu yaramay şaraitlerde olğan kamera ve anamnı arman ayında telefon etmege imkânım yoq edi, ilk küz ayında ne olacağını bilmeyim. Bundan da ğayrı, men tek senden degil, anamdan ve maña mektüpler yollağan er kesten mektüplerni almay edim. Siz maña yollağan ve Londondan biri yollağan poçta kartları qayda olğanı belli degil», — dep yazdı Oleksandr Sizikov mektübinde.
Bundan da ğayrı, 2026 senesi arman ayında ruslar siyasiy mabüsni apishaneden müstemlekege avuştırmaq kerek ediler. Amma şimdi onı 2027 senesiniñ qara qış ayına qaldırıp, qanunsız «mahkeme» tayin etkeninden daa ziyade vaqıt devamında daa beter ve daa qattı şaraitlerde tutalar.
Hatırlatamız ki, 2009 senesinden berli Oleksandr Sizikovnıñ körmemezlik sebebinden I gruppa saqatlığı bar. Adam qaza neticesinde eki közünden de kör oldı. Körme saqatlığından ğayrı, Oleksandrnıñ daa bir hastalığı bar — başqa bir qaza neticesinde onıñ talağı çıqarıldı. Siyasiy mabüsniñ daa bir hronik mide ve boyun-belkemik bölügi hastalıqları bar.
2020 senesi oraq ayınıñ 7-nde Rusiye quvetçileri — «E» merkezi, Rosgvardiya, FSB ve «Berkut» birleşmesiniñ temsilcileri — Qırımda Qırım musulmanlarınıñ evlerini tinttiler. Üç adam «Hizb ut-Tahrir davası»nıñ dörtünci Bağçasaray gruppasınıñ mabüsleri oldı. Olar — Alim Sufyanov, Seyran Hayredinov ve Oleksandr Sizikov.
Rusiye prokurorlığınıñ versiyasına köre, Oleksandr «Hizb ut-Tahrir» islâm firqasınıñ teşkilâtçısı edi (o, dünyanıñ bir çoq memleketinde ve Ukrayinada serbest çalışa, Rusiyede ise 2003 senesinden berli yasaqlanğan). Rostov-na-Donudaki Cenübiy bölge mahkemesi Sizikovnı sert rejimli müstemlekde 17 yılğa üküm etti, onıñ ilk 4 yılı apiste keçti. Mahkemeci Kırılo Kıivtsov üküm çıqardı. Daa soñra Vlasiha şeeriniñ Arbiy istinaf mahkemesinde mahkemeci Maksim Panin bu ükümni tasdıqladı.
2020 senesi Oleksandr apiske alınğanından başlap, istinaf mahkemesiniñ qararına qadar, sağlıq vaziyeti sebebinden o, ev apsinde edi. 2024 senesi ilk küz ayınıñ 14-nde, Rusiyeniñ ekinci instantsiya mahkemesiniñ qararından bir kün keçken soñ, Sizikovnı Bağçasaray rayonınıñ Sebastyanivka köyündeki evinde apiske aldılar.
2025 senesi mayısnıñ 26-nda Rusiye Federatsiyasınıñ Krasnoyarsk vilâyetiniñ Minussinsk şeer mahkemesi Oleksandr Sizikovnı hastalıq sebebinden apisten boşatqanı belli oldı. O, Qırımğa qayttı.
Orta küz ayınıñ 21-nde Krasnoyarsk vilâyet mahkemesi Sizikovnıñ azat etilüv qararını lâğu etip, apishanege qaytarmağa qarar berdi.
Orta küz ayınıñ 23-nde gece «polis» onı işğal etilgen Qırımnıñ Bağçasaray rayonında tintti ve yaqaladı.
Ertesi künü Qırımnıñ işğalli Bağçasaray rayon mahkemesi kör musulmannı «poliske boysunmağanı» içün 10 künge memuriy apis cezasına mahküm etti.
Orta küz ayınıñ 31-nde işğalli Qırım Yuqarı mahkemesi bu «qarar»nı lâğu etti ve onı apisten boşatmaq kerek ediler. Amma advokat Emil Kurbedinov onı izolâtordan alıp olamadı.
Boş aynıñ 5-nde advokat bildirdi ki, Qırım siyasiy mabüsini Rusiye işğalcileri Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 1-inci SİZOsında tutmağa devam eteler ve onı etap etmege azırlaylar.
2026 senesi qara qış ayınıñ 8-nde Sizikovnı Rusiye Yekaterinburg üzerinden tranzitnen alıp kettiler ve kiçik aynıñ ortasına qadar onı Qırımdan 5 biñ kilometr uzaqlıqta olğan Minusinsk apishanesine etap ettiler.
Rusiye Federatsiyası ükümetiniñ 2004 senesi kiçik aynıñ 6-da qabul etilgen 54-nci «Hastalıq sebebinden apisten boşatılmağa istegen mahkümlerniñ tibbiy baqıluvı aqqında» qararına binaen, bütünley körmesizlik diagnozları azat etilüv cedveline kirsetile. Rusiye qanunlarına köre bile, Oleksandr Sizikovnı cezalandıruv sistemasınıñ iç bir müessisesine yollamaq kerek degil edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız