Qırımtatarlarnıñ evlerinde keçirilgen tintüvler, qanunsız yaqalavlar ve «devlet hainligi» ve «casuslıq» içün uydurılğan cinaiy işler, internette yazğanları içün taqip — bu afta Qırımdaki repressiyalar aqqında tarif etemiz.
İşğalciler Qırımda yerli sakinlerge qarşı basqını quvetleştire: evlerni ve garajlarnı teşkere — QRM
Qırımtatar resurs merkezinde bildirgenlerine köre, «quvetçiler» eki-üç gruppalarnen evlerni dolaşıp, yerli sakinlerniñ azbarları ve garajlarını teşkere ve «gizlegen yerler» ve uçaqlarnı yapmaq içün donatmalarnı qıdıralar.
Qırımda işğalciler qırımtatarlarnıñ evlerini eki kere qanunsız şekilde tinttiler — QRM
Belli oldı ki, oraq ayınıñ 7-nde ve 16-nda işğalli quvetçiler Qırımda qırımtatarlarnıñ evlerini qanunsız olaraq tinttiler — Perekop (Or Qapı) şeerinde ve Perekop (Or Qapı) rayonında.
Arman ayınıñ 18-nde Qırımtatar Resurs Merkezi Facebookta bu aqqında haber berdi.
İşğalciler Sevastopol sakinine qarşı «devlet hainligi» içün dava açtılar
İşğal etilgen Sevastopolda (Aqyarda) 54 yaşındaki yerli sakinni tutıp, oña qarşı «devlet hainligi» ve «patlayıcı maddeler ya da patlatıcı aletlerniñ qanunsız qullanuvı» boyunca cinaiy dava açtılar. Tahqiqatnıñ malümatına köre, adam Ukrayina havfsızlıq hızmetinen işbirlik tutqan edi.
«Kuratornıñ emrine köre, cinayetçi Rusiye Mudafaa nazirliginiñ bölgedeki obyektleri aqqında malümat toplap, onı duşmanğa yollay edi. Bundan ğayrı, agentke patlayıcı aletlerniñ qısımları olğan gizli yerlerge dair vazifeler berildi», — dep qayd etildi haberde.
Sevastopolda işğalciler 18 yaşındaki yigitni qanunsız olaraq tuttılar
İşğalli «taqiqatçılar» Sevastopol (Aqyar) şeeriniñ 18 yaşındaki sakinine qarşı sözde «terrorizmni açıqtan aqlağanı ve natsizmni reabilitatsiya etkeni» içün «mahkeme»ge qabaatlayıcı aktnı yolladılar. Olarnıñ aytqanlarına köre, o, internette olarnıñ cinaiy taqip içün esas olğanını sayğanları bildirüvni yazdı. Onı tuttılar.
Arman ayınıñ 19-nda işğalli «Qırım ve Sevastopol taqiqat eyyeti» bunı bildirdi.
İşğalciler Qırım sakinine qarşı «casuslıq» sebebinden dava açtılar
İşğal etilgen Qırımda Foros meskünn yeriniñ 59 yaşındaki sakinini tuttılar, onı Rusiye sıñırcıları aqqında malümatnı ukrayin tarafına bergeninde qabaatlaylar. Oña qarşı «casuslıq» maddesine binaen cinaiy dava açıldı. Adam 20 senege qadar apis cezasına mahküm etile bilir.
RİA «Novosti Krım» Rusiye teşviqiy haber agentligi, RF FSBniñ İctimaiy alâqalar merkezine atıf etip, bunı bildirdi.
Rusiye quvetçileriniñ malümatına köre, adam öz başına Ukrayina Sıñır Hızmetinen alâqağa kirdi ve RF sıñır hızmeti obyektleriniñ yerleşkeni aqqında malümat berdi. FSBniñ bldirgenine köre, bu, Rusiyege ücümler yapmaq içün qullanıla bilir edi.
Adler ava limanında rusiyeliler 28 yaşında Qırım sakinini tuttı: onı «İyegova şaatları» teşkilâtında qabaatlaylar
Rusiye uquq qoruyıcıları işğal etilgen Qırımnıñ 28 yaşındaki sakini Rusiyeden çıqmağa tırışqanını Adler ava limanında tuttılar, dep bildirdi. Onı Rusiyede yasaq etilgen ve «ekstremist» sayılğan «İyegova şaatları» diniy teşkilâtınıñ Aluşta merkezindeki faaliyetini teşkil etkeninde qabaatlaylar.
Aqmescitte Rusiye ordusınıñ itibarını tüşürgeni içün aqayğa 30 biñ ruble para cezası berildi — Mahkeme. Qırım saifesi
İşğal etilgen Aqmescitte (Simferopol) qırımlı Gennadiy Yantşevskiyge Telegramda yayınlağan yazıları içün Rusiye ordusını «aqaretlegen»ı içün 30 biñ ruble para cezası berildi. Uquq qoruyıcılar, onıñ Rusiye tecavuzına qarşı çıqqanı ve USQ-ğa qoltutqanı içün taqip etilgenini bildire.
Arman ayınıñ 22-nde ''Tribunal. Qırım saifesi'' uquq qoruyıcı leyhası bu aqqında haber etti.
Bu vaqia adiy bir şey, yarımadada bir çoq insan qayd etile. Bu dava «qanunsızlıqnıñ özü» ifadeleri ile diqqatnı celp etti. Mahkemeci, Yançevskiyniñ problemleri Rusiye arbiylerine olğan işançını bozmaq içün degil de, Rusiye istilâsına qarşı çıqqanı içün başlağanını utanmayıp yaza. Rusiye Anayasa mahkemesi fikir bildirüv (esas qanun tarafından kefil etilgen) ile işançnı bozmaq içün yapılğan areketler arasında farq etmege çağırsa da, — uquq qoruyıcılar bunı qayd eteler.
Keriçte gizlengen benzin taşıyıcınıñ videosı içün adam RF ordusını «itibardan tüşürüvi» maddesine mahkeme etildi
İşğalcilerniñ 2026 senesi ilk yaz ayında Keriçte gizlengen benzin taşıyıcınıñ videosını çekken adamğa tayin etkenleri qanunsız «ceza» belli oldı. «Mahkemeci» Nataliya Titova, sözde «Rusiye ordusını itibardan tüşürüv» maddesi boyunca 30 biñ rublelik (≈ 15 biñ ğrn — muar.) para cezasını tayin etti.
İşğalli «Keriç şeer mahkemesi»niñ saytında qayd etile ki, qarar 2026 senesi arman ayınıñ 18-nden itibaren işine tüşe.
«Mahkeme»niñ saytındaki haberden belli oldı ki, Keriçli Serğiy Makedonskıyğa «RF ordusını itibardan tüşürgeni» içün protokol tizildi. Adam özü memuriy davanıñ baqılmasına mahkemege kelmedi, amma sözde «öz qabaatını tanıdı ve tevbe etti».
Krasnodarda mahkeme siyasiy mabüs Diana Ğavrılükniñ apis müddetini orta küz ayınıñ 14-ne qadar uzattı
Belli oldı ki, Rusiyede Krasnodar rayon mahkemesi, Ukrayina vatandaşı Diana Ğavrılükniñ (Abduraşıtovanıñ) qanunsız apis müddetini 2026 senesi orta küz ayınıñ 14-ne qadar uzattı. 2025 senesi orta küz ayınıñ 31-nde ruslar onı Soçi ava limanında qanunsız şekilde tuttılar. O, Türkiyeden işğal etilgen Qırımğa, aqrabalarınıñ yanına uça edi Türkiyede oña tibbiy ameliyat yapılğan edi. Tutulğan soñ, ruslar qadınnı Abhaziyağa avuştırsılar, soñra ise — Voronej vilâyetiniñ Borisoglebsk şeeriniñ taqiqat izolâtorına ketirildi, anda, qorantasınıñ şaatlıqlarına köre, oña işkence yapılğan edi.
Onıñ aqayı Andriy Ğavrılük Qırım uquq qorçalayıcı gruppasına (QUQG) qanunsız apisniñ uzatılğanı aqqında bildirdi.
2026 senesi saban ayında Krasnodar Oktâbrskiy rayon mahkemesiniñ mahkemecisi Oleksandr Zelenskıy oña qarşı apis şeklind qorçalayıcı tedbirni tayin etti. Şimdi onıñ apis müddeti orta küz ayınıñ 14-ne qadar uzatıldı.
Ruslar Çelebicihan batalyonınıñ arbiy esiri Seyran Asanovnı qanunsız şekilde «Vladimirskiy tsentral»ğa etap ettiler
Belli oldı ki, ruslar qırımtatar, ukrayin arbiy hızmetçisi Seyran Asanovnı qanunsız şekilde «Vladimirskiy tsentral»ğa keçirdiler. Onı 20 senege müstemlekege «mahküm ettiler», bunıñ 5 senesini o apishanede «keçirmek» kerek. Rusiye esirligine arbiy adam 2024 senesi orta küz ayınıñ 18-nde Donetsk vilâyetiniñ Volnovaha rayonınıñ Zolota Nıva meskün yeri rayonında tüşti.
Qırımtatar Resurs Merkezi bunı bildirdi.
«İşğalcilerge, arbiy hızmetçini esirlikke alğan soñ, oña qarşı davanı uydurmaq ve onıñ yapmağanı cinayet içün qanunsız üküm çıqarmaq içün 17 ay kerek oldı. 2026 senesi saban ayınıñ 11-nde, tayin etilgen advokat Yelızaveta Mikayelân, Seyrannıñ evelki apayı Nadiyağa, mahkeme oturışlarınıñ devam etkenini ve bir qaç oturıştan soñ, eñ ihtimalli, üküm çıqarılacağını bildirdi, bu ise, kerçekten, 2026 senesi çiçek ayınıñ 2-nde oldı», — dep hatırlattı QRM.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız