Arman ayınıñ 19-nda sabadan berli işğal etilgen Yaltada dağlıq yerde orman yana. Başta işğalli qurtarıcılar bildirgen ediler ki, yanğın alanı 3 gektarğa yete ve onı söndürmek içün 400 insan ve 100 tehnika celp etildi. Bugün, arman ayınıñ 20-nda, belli oldı ki, yanğın alanı ciddiy olaraq arttı — 10 gektarğa qadar. Qırımda yanğınçılarğa yardım etecek göñüllilerni qıdıralar.
İşğalli «Qırım parlamenti»niñ matbuat hızmeti Telegramda bunı bildirdi.
«Landşaft yanğınını söndürmek içün göñüllilerni Yaltada qıdıralar. Autka mikrorayonında orman yana. Yanğın alanı endi 10 gektardan aştı. Tek idareden 500'ge yaqın insan ve 100'den ziyade maşna celp etildi. Göñüllilerge esas talaplar — 18 yaştan büyük olmaq ve sağlıqnen bağlı meseleleriniñ olmamasıdır», — dep qayd etildi haberde.
Autka — Qırımda, Yalta şeeriniñ toprağında, dağ etegi zonasında yerleşken bir mikrorayondır.
Yanğınnıñ sebepleri aqqında işğalciler malümat bermeylar. RİA «Novosti Krım»nıñ arman ayınıñ 19-na ait haberinde qayd etilgen edi ki, yanğın qıyın irişilebilir bir yerde çıqtı, yanğınçılar dağlıq yerden ayaqnen ketmege mecbur qalalar, tehnikanen yaqınlaşmaq mümkün degil. Tek bugün, arman ayınıñ 20-nda, ruslar yanğınnı söndürmek içün aviatsiyanı celp ettiler.
«Qırım yeli» Telegram kanalı bildirdi ki, bu yanğın, Yaltada arman ayınıñ 19-nda ast stantsiyalarğa yapılğan ücüm vaqtında Rusiye ava mudafaasınıñ çalışması neticesinde çıqtı.
Hatırlatamız ki, arman ayınıñ 23-ne qadar Qırımda fevqulâde yanğın telükesi devam ete.
«Arman ayınıñ 20, 21, 22 ve 23-nde Qırımnıñ şarqiy ve cenübiy rayonlarında fevqulâde yanğın telükesi saqlanır, ğarbiy rayonlarda ise fevqulâde yanğın telükesi beklenilir. Hatırlatamız ki, oraq ayınıñ 24-nden berli bütün yarımada toprağında mahsus yanğınğa qarşı rejim ilân etildi. Bu devirde ormanlarda, tabiiy ekosistemalarda ve olarğa yaqın topraqlarda ateş yaqmaq ve açıq ateşnen yanğınğa telükeli işler yapmaq, şu cümleden quru ösümliklerni ve ev çöplerini yaqmaq yasaqtır. Yanğın telükesizligi talaplarını bozğanı içün 10 biñden 800 biñ rublege qadar (≈ 5—400 biñ ğrn — muar.) ceza közde tutıla», — dep bildirdi işğalli Qırım «ükümeti».
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız