İşğalli Qırım Yuqarı mahkemesi Bağçasaray rayonınıñ 56 yaşındaki sakinini Ukrayina Silâlı quvetlerine para yollağanı içün «devlet hainligi»nde qabaatlap, umumiy rejimli müstemlekede 15 yılğa üküm etti.
Oraq ayınıñ 31-nde işğalli Qırım prokurorlığı Telegramda bunı bildirdi.
«Mahkeme, qadınnıñ 2022 senesi çiçek ayından orta küz ayına qadar Ukrayina Silâlı quvetleriniñ menfaatları içün para toplamaq içün bank esabına 23 biñ rubleden çoq para yollağanını belgiledi. Aynı zamanda qabaatlanğan qadın para Rusiye Federatsiyası Silâlı quvetlerine qarşılıq köstermek ve zarar ketirmek maqsadınen qullanılacağını añlay edi», — dep qayd etildi haberde.
«Prokurorlıq»nıñ qayd etkenine köre, qadın 15 yıllıq apis cezasını çekecek soñ bir yılğa areket sıñırlamalarına oğraycaq.
Hatırlatamız ki, 2022 senesi saban ayınıñ 4-nde Rusiye «Rusiye ordusını itibardan tüşürüv» maddesine qarşı memuriy ve cinaiy mesüliyetni kirsetti. İnsan aqları bölge merkeziniñ adliyecileri ve mütehassıslar «Mecburen sadıqlıq» adlı tedqiqatnı keçirip, Rusiyeniñ Qırımdaki vatandaşlarnıñ narazılığını ne sebepten ve nasıl etip toqtatqanını, insanlarnıñ fikir serbestligini ve adaletli mahkeme aqqını coyğanını ögrendi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız