Oraq ayınıñ 6-nda Kıyivde işğal etilgen Qırımğa bağışlanğan yañı mektüp pulu taqdim etildi. Seriyada "Qırımtatar resurs merkezi"niñ levhaları esasında yaratılğan kupon ve bediiy zarfnen sekiz mekütp pulu bar. Resimlerniñ müellifi ukrayin ressamı Andriy Yermolenko oldı.
Taqdim merasimi Qırımtatar resurs merkeziniñ Facebook saifesinde yayınlandı.
"Bu taqdim ukrayin Qırımına, vaqtınca işğalge qarşılıq kösterüvge, yarımadada qalğan ve Qırımnıñ azat etilmesi içün elinden kelgenini yapqan insanlarnıñ cesaretine bağışlana. Resim olaraq ukrayin ressamı Andriy Yermolenkonıñ yaratqanı Qırımtatar resurs merkeziniñ levhaları qullanıldı. Mektüp pulları öz semereligini isbatladı ve yalıñız poçta ödemesiniñ işaretleri degil, bizim memleketimizniñ dünyada müim ve aktual vaqialar aqqında ikâye etken elçilerimiz oldı", — dep tarif etti Nataliys Muhina, Ukrpoştanıñ filatelistik mahsulatı idaresiniñ yolbaşçısı.
Oraq ayınıñ 6-ndan itibaren mektüp pulunı dünyanıñ er bir köşesinden online satın almaq mümkün. Bir kâğıtta kupon ve bediiy zarfnen 8 mektüp pulu bar. Neşirniñ esas ğayesi — "Qırımda başlandı — Qırımda bitecek!". Onıñ fiyatı — 700 ğrıvnâ.
Qırım aqqında er vaqıt aytmaq kerek, dep tüşüne "Qırımtatar resurs merkezi"niñ reisi Eskender Bariyev.
"Ukrayina mudafaa quvetleri sayesinde Qırım aqqında çoq şey aytıla. Qırımdaki strategik arbiy obyektler yoq etilip tura. Amma, diger taraftan, bizge halqara ortaqlarımızdan daima destek ve küreş kerek olğanını köstermek içün, bizge daima qol tutmaq ve yañı bir kün tertibine qaytmaq kerek. Biz Qırımnı çetelde qaldırıp olamaymız, çünki anda bizim halqımız, Ukrayina devletiniñ ve cemiyetiniñ qorçalamaq kerek olğan Ukrayina tamır halqları buluna", — dep bildirdi o taqdimde.
Andriy Yermolenko, ressam, arbiy hızmetçi, resimlerniñ icracısı olaraq çıqışta bulunğanını aytıp berdi, ğayelerniñ çoqusı ise Qırım gençlerine aittir, olarnen çeşit tedbirlerde körüşip, yarımadanı işğalden azat etüv meselelerine halqara diqqatınıñ müimligini qayd etti.
"Bir çoq genç Qırımnıñ qaytmasını istey. Menim içün, ressam olaraq, olar fikirlerni yarata ediler. Bir çoq şey aqqında laf ettik — levhalarda ne yapıla bilecegi, ne yapılmay bilecegi, levhalarda nasıl timsaller qullanıla bilecegi aqqında. Çoqusı ğayelerge men qoşuldım, men tek icracı edim. (...) Qırım Ukrayinağa qaytarılmağanına qadar cenk bitmeycek ve bugünki kibi ücümler devam etecek. Qırımnı qaytarmaq kerek olğanımıznı daima aqılımızda tutmaq kerekmiz, ve Qırım medeniyeti inkişaf etti", — dep qayd etti ressam.
Bundan evel Ukpoşta Ukrayina Mudafaa quvetleri tarafından Qırım köprüniñ qısmen viran etilmesine ve Ukrayinağa Skit altını qaytarılmasına bağışlanğan mektüp pullarını çıqardı. Bundan da ğayrı, 2024 senesi qırımtatar örneginen mektüp pulu çıqarıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız