Balker PANORMITIS (IMO: 9445021) İsrailniñ Hayfa limanına keldi. O, Ukrayinanıñ işğal etilgen topraqlarından kelgen boğdaynı taşıy.
Çiçek ayınıñ 27-nde İsrail jurnalisti Barak Ravid X içtimaiy ağında bu aqqında haber etti.
"Yüksek dereceli ukrayin diplomatik menbası maña bildirdi ki, işğal etilgen Ukrayina topraqlarından hırsızlanğan boğdaynı taşığan PANORAMITIS gemisi Hayfa limanına kelip, yüküni boşatsa, Ukrayina ve İsrail munasebetlerinde buhran peyda olur", — dep jurnalist yazdı.
MarineTraffic hızmetiniñ malümatına köre, balker İsrail yalısına çiçek ayınıñ 25-nde kelip çıqtı ve yüklenilmesini bekley.
UPD // Ukrayina tarafı, Rusiye tarafından Ukrayinanıñ işğal etilgen topraqlarından hırsızlanğan ukryain ububatınen "Panormitis" gemisi Hayfağa kelgeni sebebinden devletlerara munasebetler kerginleşe bilecegi aqqında İzrailni tenbiyeledi. Bu, 2026 senesi çiçek ayında olğan ekinci vaqia. Ukrayin diplomatiyasınıñ menbası anonimlik şartlarında bu aqqında haber etti.
Subetdeşimizniñ sözlerine köre, Kıyiv vaziyetke tafsilâtlıca diqqat ayıra ve İzrail akimiyetinden geminiñ yüküni almağa red etmesini talap etecek. Öyle olmasa, Ukrayinanıñ ''halqara diplomatik ve uquq mehanizmleri''ni qullanmaq aqqı olur. Bundan ğayrı o, halqara sanada Ukrayinanıñ İzrailge evel bergeni destekke köre, bu vaqianı ''şamar'' olaraq adlandırdı. Diplomat qayd etti ki, geminiñ yüküniñ çıqarılmasınıñ eki taraflı munasebetler içün aqibetleri olur.
Çiçek ayınıñ 27-nde saat 20:39-da X içtimaiy ağında Ukrayina tış işler naziri Andriy Sıbiğa yazdı ki, saba İsrail elçisini bekley ve narazılıq bilgesini kösterecek.
"Şimdi, Hayfağa daa bir gemi kelgende, bizler İsrailge hırsızlanğan ububatnı qabul etmemesi ve munasebetlerimizge zarar ketirmemesi aqqında tenbiyelemiz. Bu munasebetnen, biz artıq İsrail elçisini tış işler nazirligine yarın saba davet ettik ve narazılıq bildirgen ve kerekli tedbirlerni almağa rica etken notamıznı teslim etecekmiz", — dep haberde qayd etildi.
SeaKrime leyhasınıñ jurnalisti Katerına Yareskonıñ malümatına köre, balkerde 6 biñ tonnadan ziyade boğday ve 19 biñ tonna arpa bar.
"Keriç ve Berdânskadan bütün PANORMITIS yükü çıqarılğanına dair alâmetler bar, amma bunı tasdıqlap olamaymız. Biz tek bir taşıyıcınıñ delillerini toplap oldıq — LEONID PESTRIKOV (IMO: 9922122), o, 6087.68 tonna arpa ve 954.56 tonna boğdaynı Berdânskadan ketirip, çiçek ayınıñ 18-nde PANORMITISke yükledi. "Pesrikova" gemisiniñ yük vesiqaları Rusiyeniñ Temrük limanında resmiyleştirilgen edi. Berdiyanskta gümrük noqtası olmağanı içün, bu, Rusiye işğalcilerine aşlıqnıñ peyda oluvını gizlemege yardım ete", — dep Yaresko añlattı.
İsrailniñ “Haarets” gazetasınıñ araştırmasında da 2026 senesi İsrailde hırsızlanğan ukrayin ububatınıñ dört yükü boşatılğanı añıla. Olarnıñ aytqanlarına köre, daa bir gemi bazar künü sabasında (2026 senesi çiçekniñ 26 — muar.) Hayfağa keldi ve öz nevbetini limanğa kirmege bekley.
"Eki israilli boğday alıcısı "Haarets"ke Ukrayinadan hırsızlanğan boğday İsrailde satılğanını tasdıqladı. İsrailge kelgen yük taşıyıcıları Rusiye limanlarında boğdaynı almadılar. Onıñ yerine olarnı deñizden 10 kilometrge yaqın uzaqlıqta yüklediler, bu adlandırılğan STS, deñizde biri-birine bu taşuvlar Qara deñizde Keriç boğazından cenüpte olıp keçti – bir taraftan Rusiye toprağı ve diger taraftan Rusiye işğal etkeni Ukrayina toprağınıñ arasındaki keçit”, — dep qayd etile teşkerüvde.
Tedqiqat keçirgen jurnalistlerniñ aytqanlarına köre, İsrailge kelmezden evel, bazı quru yük gemileri Rusiye yüzüci ububat anbarları olaraq qullanğan büyük yük gemilerinen de rastkelişkenler. Digerleri ise doğrudan-doğru işğal etilgen topraqlardan hırsızlanğan aşlıqnı ketirgen kiçik gemilerden taşıy ediler.
Ukrayina Hayfada qabul etilgen hırsızlanğan boğdaylı Rusiye kölge flotunıñ gemisi aqqında İsrailden aydınlatma soradı. O vaqıtta tış işler naziri Andriy Sıbiğa, Rusiyeniñ «ABİNSK» (İMO: 9303869) quru yük gemisi gemisinde 43 biñ tonna hırsızlanğan boğdaynen Hayfa limanına kirgeni aqqında malümat alğan soñ, İsrailniñ tış işler naziri Gideon Saarğa telefon etti.
"Men qayd ettim ki, hırsızlanğan ukrayin köy hocalığı mahsulatlarınıñ qanunsız eksportı Rusiyeniñ daa keniş arbiy ğayretleriniñ bir qısmıdır. Hırsızlanğan mallarnıñ böyle qanunsız ticaretine tolerantlıq berilmemek kerek. Biz eki taraflama kündüzlikni ileriletmek ve faal dialognı devam etmek içün özara meraqımıznı tasdiqladıq, şu cümleden, kelişilgen havfsızlıq meseleleri boyunca".
Hatırlatmaq kerek ki, Rusiyeniñ quru yük gemisi «ABİNSK» (İMO: 9303869) 21 kün toqtavdan soñ İsrail limanına kirdi — sabannıñ 23-ten çiçekniñ 12-ge qadar yük taşıyıcısı tasdiqnı bekley edi. Jurnalistlerniñ aytqanlarına köre, gemide işğal etilgen Ukrayina topraqlarından hırsızlanğan 43 biñ tonnadan ziyade boğday bar edi. Açıq menbalarğa köre, Rusiyeniñ quru yük gemisi «ABİNSK» işğal etilgen Keriçte yazılğan ve 2026 senesi saban ayınıñ 17-de limandan yolğa çıqqan, 2026 senesi çiçek ayınıñ 12-de onı Hayfa limanında qabul ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız