Kıyivde "Qırımtatar tili ve medeniyetini saqlav maarif ameliyatları: "Ziyalı sesler" leyhasınıñ tecribesi" forumı olıp keçti. İştirakçiler teşebbüsniñ neticelerini, tilniñ ögretüvinde olğan qıyınlıqlarnı ve devlet seviyesinde onı kenişletmek imkânlarını muzakere ettiler.
Forumnı Suspilne Qırım mühbiri ziyaret etti.
"Ziyalı sesler" leyhası Novopeçersk mektebinde prezidentniñ Qırım Muhtar Cumhuriyetindeki Temsilciligi ile işbirlikte ömürge keçirile. O, til kurslarını medeniy tedbirlernen birleştirip, Qırım mevzusını tasil esnasına daa teren integratsiya ete.
Leyha koordinatorı, Novopeçersk mektebiniñ pedagog-teşkilâtçısı Olğa Krapıvyanska, teşebbüs ayrı tedbirlerden tam tasil programmasına çevirilgenini tarif etti.
"Bu, prezidentniñ Qırım Muhtar Cumhuriyetindeki temsilciligi ile birlikte yapılğan teşebbüs. 2024 senesi qırımtatar tiliniñ inkişaf kontseptsiyasını elde ettik. Azırlanuv tedbirleri til ve medeniyet qısımlarınen bütün bir leyhağa çevirildi. Çünki tilni tarihiy ve medeniy kontekstni añlamadan ögrenmek qıyın", — dep Krapıvyanska tarif etti.
O şunı da qoştı ki, dersler esas oquv saatlerinden soñ keçirile ve mektepten tış balalar içün de açıq, teşkilâtçılar ise derslerniñ oflayn formatını saqlap qala.
"Dersler esas derslerden soñ keçirile, bu, yedinci ders. Diger mekteplerniñ talebeleri de qoşula bileler. Amma Kıyiv pek büyük, ve bir çoq qoranta içün yolculıqnı teşkil etmek qıyın. Aynı zamanda offline formatnı saqlamaq müimdir, çünki canlı munasebetler daa semereli ola", — dep qayd etti o.
Krapıvyanska leyhanıñ yaş auditoriyasınıñ kenişletilmesine diqqat ayırdı.
"Bu sene leyhamızğa yañı mektep qoşuldı, çünki ameliyat köstergeni kibi, eñ çoq muracaatlar başlanğıç sınıflardan kele. Bazı talebeler devamlı ziyaretçiler olalar, ve bu bizim içün pek qıymetli", — dep o ayttı.
Tasil ve ilim nazirligi teşebbüsni perspektivalı saya ve onıñ inkişafına qol tutmağa azır.
"Bugün leyha aqqında daa çoq ögrendim ve oña qol tutmaq mümkün olğanını añladım. Şimdi muayyen adımlar aqqında aytmaq qıyın, amma bu leyha inkişaf etmeli, dep 100% eminim. Biz onı populârlaştırmağa ve kenişletmege isteymiz, çünki bu kerçekten de yahşı bir teşebbüs", — dep TİNniñ Mektep tasil meseleleri mütehassıs gruppasınıñ idarecisi vazifelerini eda etken Dmıtro Çuprina qayd etti.
Medeniyet nazirligi bu kibi teşebbüslerniñ cemiyet içün daa büyük emiyetini qayd ete.
"Leyhanıñ qıymeti şunda ki, o, ukrayin balalarına qırımtatar tilini ögrete ve tamır halqınıñ medeniyetini aça. Qırımtatar tili bir çoq türkiy tillerni añlamaq içün anahtar ola. Onı ögrenüv ukrayin medeniyetiniñ inkişafına ve cemiyette tolerantlıqnıñ arttırılmasına yardım ete", — dep nazirlikniñ vekili Olğa Vışnevska qayd etti.
O şunı da qoştı ki, devlet bu kibi leyhalarğa qol tuta, hususan Ukrayin medeniyet fondunıñ grant programmaları vastasınen.
Leyhanıñ iştirakçileri — mektep talebeleri — ögrenüvniñ ameliy merağı aqqında aytalar.
"Leyhanı kördim ve qırımtatar tilini ögrenmege istedim. Bizde belli bir maqsat bar, ve biz tezliknen degil de, neticelernen çalışamız. Taqdim etüv ve oyunlar pek yardım ete — kerçekten de çalışa ve hatırlamağa yardım ete", — dep talebe Mira Ğanja paylaştı.
Teşkilâtçılarnıñ aytqanına köre, iştirakçilerniñ az olğanına baqmadan, kurslarnıñ qatnaşuvı stabil qala, leyha ise kenişletmege planlaştıralar, hususan online format ve yañı yaş gruppalarınıñ celp etilmesi sayesinde.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız