İşğalli Qırım memuriyeti, Rusiye akimiyeti tarafından belgilengen qaidelerge köre topraq damartılarını resmiyleştirgen yerli sakinlerniñ evlerini ve topraqlarını tutıp ala. Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonınıñ Uyutne köyünden eñ az 80 qorantanıñ evleri yıqıluv telükesi altında buluna.
Çiçek ayınıñ 21-nde Milliy muqavemet merkezi (MMM) bu aqqında haber etti.
İnsanlar bu topraq damartılarını Rosreestr vastasınen resmiyleştire ediler. Başta olarnı yerli "akimiyet"ten kirağa aldılar, qurucılıqtan soñ ise, işğalli Qırım yolbaşçısı Sergey Aksönovnıñ "emri"ne köre, topraq damartılarını sadeleştirilgen tertipke köre mülk olaraq satın almaq "uquqları bar edi".
MMMniñ qayd etkenine köre, şimdi "prokurorlıq" bildire ki, "66-ZRK qanunı" bozulıp, topraq damartıları berildi — tedbirler keçirilmedi ve vatandaşlarnıñ yañlış kategoriyalarına berildi.
"Bu topraqlarnı şahsen bergen Uyutneniñ sabıq "memuriyet yolbaşçısı" 200 biñ rublelik simvolik para cezasını aldı. "Mahkemeler" başta saiplerniñ aqlarını tanığan edi, amma soñra "davalar"nı yañıdan baqmağa yollay ediler", — dep haberde qayd etildi.
Merkezniñ malümatına köre, evleriniñ alınması içün insanlarğa tazminat berilmey.
Daa evel Qırımtatar resurs merkeziniñ bildirgenine köre, Rusiyede ve Ukrayinanıñ VİE topraqlarında, hususan Qırımda, saban ayından başlap işlep çıqarılmağan ya da maqsatqa köre qullanılmağan topraqlar damartıları çıqarıla bilir.
Hatırlatamız ki, qara qış ayında işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) bağça cemiyetleriniñ topraq saipleri topraq damartıları sanitar zonasında yerleşkenini ve anda mesken qurmağa mümkün olmağanını ögrendiler, dep Qırımnıñ reintegratsiyası birligi bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız