Çiçek ayınıñ 21-nde işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) dron ücümi vaqtında patlavlar ve atışlar oldı.
Şeerniñ Rusiye kontrolindeki "gubernatorı" Mihail Razvojayev bunı bildirdi.
Onıñ aytqanına köre, RF AMS, Qara deñiz flotu ve ateş gruppaları deñiz üzerinde, Şimaliy tarafında, Hersones ve Fiolent burunları, em de Verhnösadove ve İnkerman civarında sekiz dronnı urıp tüşürdiler. İlk malümatqa köre, yaralanğanlar yoq.
"Qırım yeli" Telegram kanalı şaatlarğa atıf etip, şeerde küçlü pulemöt atışları, "Belbek" ve "Qaçı" ava limanlarındaki projektorlarnıñ işi, em de Sevastopol (Aqyar) demiryol vokzalı üzerinde dronlarnıñ uçması aqqında haber etti.
Yerli Telegram kanalları Belbek, Verhnösadove, Qaçı, Fiolent, İnkerman ve Gollandiya rayonlarında da ava telükesi aqqında yazdılar. Olarnıñ malümatına köre, deñizden şeerge doğru yañı dronlar gruppaları areket ete edi.
Hatırlatamız ki, Ukrayina havfsızlıq hızmetiniñ malümatına köre, çiçek ayınıñ 18-nde gece "Alfa" arbiy hızmetçileri Sevastopoldaki (Aqyardaki) "Yugtorsan" neft bazasında yerleşken yaqarlıq anbarlarına uçucısız uçaq aletleri vastasınen zarar ketirdiler. İşğalli şeer "gubernatorı" Razvojayev "anbarlar boş" olğanını bildirdi. Amma uydu resimleri yanğan yermay mahsulatını ve eñ az eki neft bazasınıñ zarar körgenini köstere.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız