Rusiyeniñ Rostov-na-Donu şeerindeki Cenübiy bölgeniñ arbiy mahkemesi çeçek ayınıñ 8-de eñ qart Qırım siyasiy mabüsi Volodımır Ananyevniñ apis müddetini üç ayğa uzattı. İşğalciler onı "Qırım "başı" Sergey Aksönovğa ücüm azırlağanı"nda qabaatladılar.
Çeçek ayınıñ 9-nda Qırım uquq qorçalayıcı gruppası (QUQG) bunı bildirdi.
Rusiye mahkemesiniñ nevbetteki oturışı çeçek ayınıñ 21-nde olacaq.
Bundan da ğayrı, uquq qorçalayıcılar Ananyevniñ sağlıq vaziyeti fenalaşqanını qayd ettiler. Hususan, adamnıñ glaukomaİç köz basımınıñ artması ile beraber olğan hronik oftalmologik hastalıqlarnıñ telükeli gruppası. O, köz sinirleriniñ atrofiyasına ve tüzetilemez körme ğayıbına ketire.sı inkişaf ete. Em de o pek zayıflaştı, tedqiq ve tibbiy yardımğa muhtac.
Hatırlatamız ki, 75 yaşındaki Volodımır Ananyev 2025 senesi kiçik ayda işğal etilgen Qırımda apiske alınğanına qadar uquqiy ve publitsistik faaliyetnen oğraşa edi, topraq saipleriniñ aqlarını qorçalağan edi, Ukrayina Ortodoks kilsesiniñ müminlerini desteklegen edi.
Kremlniñ eñ qart siyasiy mabüsi Volodımır Ananyevniñ mentorı — Cambridge universitetiniñ Ukrayin tetqiqatları reberi, professor Rori Finnin.
Daa evel Suspilne Qırım muarririyeti Volodımır Ananyevniñ apayı Ğanna Svâtnenko, uquq qorçalayıcılar ve onıñ tanışlarınen laf etti. Olar oña qarşı "dava" aqqında aytıp berdiler.
Böylece, Volodımır Ananyevniñ Keriçte anası ve diger tuvğanları defin etildi. Apiske alınmazdan evel o, tuvğanlarınıñ mezarlıqlarını ziyaret etken edi.
Anna Svâtnenkonıñ aytqanına köre, aqayı jurnalist faaliyetinen oğraşa edi, radioda bir sıra programmaları bar edi, anda o diñleyicilerge topraq meseleleriniñ inceliklerini añlata edi.
Bundan da ğayrı, 1998 senesi "Başqasınıñ belâsı olmaz" adlı öz neşriyat cıyıntığını çıqardı. O, "Viçe" bölge Jıtomır gazetası, "Ças/Time", "Ükümet kuryeri", "Mustaqillik" gazetalarınen işbirlikte bulunğan edi.
Ananyevniñ apayı 2025 senesi qayd etti ki, onıñ bir sıra hronik hastalığı bar, o, daima ilâclarğa muhtac, şunıñ içün apishanede qalması mümkün degil. Ruslarnıñ qabaatlav maddelerine köre, adam 15 yılğa qadar apis cezasını ala bile. O, Rusiye sisteması tarafından qabaatlanğan iç bir şeyni tanımadı.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız