Qırım siyasiy mabüsi, 17 yılğa apis cezasına qanunsız şekilde mahküm etilgen ve I gruppa körme saasındaki saqat Oleksandr Sizikov, apis yerlerinde bulunğanda sağlıq vaziyeti fenalaşqanını bildirdi.
Siyasiy mabüsni qoltutuv gruppasında onıñ anasınen telefon subetinden soñ belli oldı.
Tuvğanlarınıñ aytqanına köre, Sizikov devamlı suvuqlanuv aqqında tarif etti, o, etap vaqtında başladı ve karantin vaqtında küçlendi. O, ağır tutuv şaraiti aqqında da bildirdi.
"O, yatmağa mecbur olmağanını ayttı, şunıñ içün er kesnen beraber yataqqa uzanıp olamayıp, oturmağa mecbur oldı", — dep qoltutuv gruppasınıñ haberinde aytıla.
Bundan da ğayrı, siyasiy mabüs, oquş qabiliyetini coyması içün, oña kitaplar, şu cümleden, şahmat, añlatmalarnen cinaiy-icra kodeksi ve Brayl elifbesini bermege rica ete.
Soy-soplar bildirdi ki, körme qabiliyeti zayıf olğan insanlar içün mahsus cihaz vastasınen bazı metinlerni yollamağa planlaştıralar, lâkin şimdilik olarnı yollamaq zor, çünki sıñırlav rejimi pek sert.
Qayd etilgenine köre, tuvğanları yollağan paralar sayesinde Sizikov elektrik çay makinesini satın ala bildi, bu ise, onıñ içün de, kameradaki diger mabüsler içün de yaşayış şaraitini biraz eyileştirdi.
Oleksandr Sizikov 2009 senesi qaza neticesinde bütünley kör oldı ve I-nci gruppa saqatı. Bundan da ğayrı, o, hronik miden ve bel hastalıqlarından da zarar köre.
Qara qış ayınıñ 26-nda umumiy yurisdiktsiyalı sekizinci kassatsiya mahkemesi, evel apellâtsiya mahkemesi tarafından apishanege qaytaruılmaq qararını çıqarğan bütünley kör Qırım siyasiy mabüsi Oleksandr Sizikovnıñ advokatınıñ kassatsiya şikâyetini baqmağa red etti.
Hatırlatamız ki, 2025 senesi mayısnıñ 26-nda Rusiye Federatsiyasınıñ Krasnoyarsk vilâyetiniñ Minusinsk şeer mahkemesi Oleksandr Sizikovnı hastalıq sebebinden apisten boşatqanıbelli oldı. O, Qırımğa qayttı.Orta küz ayınıñ 21-nde Krasnoyarsk vilâyet mahkemesi Sizikovnıñ azat etilüv qararını lâğu etip, apishanege qaytarmağa qarar berdi.
Orta küz ayınıñ 23-nde gece "polis" onı işğal etilgen Qırımnıñ Bağçasaray rayonında tintti ve yaqaladı.
Ertesi künü Qırımnıñ işğalli Bağçasaray rayon mahkemesi kör musulmannı "poliske boysunmağanı" içün 10 künge memuriy apis cezasına mahküm etti.
Orta küz ayınıñ 31-nde işğalli Qırım Yuqarı mahkemesi bu "qarar"nı lâğu ettive onı apisten boşatmaq kerek ediler. Amma advokat Emil Kurbedinov onı izolâtordan alıp olamadı.
Boş aynıñ 5-nde advokat bildirdi ki, Qırım siyasiy mabüsini Rusiye işğalcileri Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 1-inci SİZOsında tutmağa devam eteler ve onı etap etmege azırlaylar.
Qara qış ayınıñ 8-nde kör Sizikovnı Qırımdan 5 biñ kilometr uzaqlıqta yerleşken Rusiyeniñ Minusink şeerindeki apishanege etap ettiler.
2024 senesi ilk küz ayında Moskva vilâyetiniñ istinaf mahkemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve köre qabiliyet saqat qırımtatar Oleksandr Sizikov. Olar tintüvler ve "mahkeme tahqiqatı" vaqtında yapılğan bir sıra bozuvlarnı qayd ettiler.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
2025 senesi mayıs ayınıñ 26-nde belli oldı ki, Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı azat etti. O, Qırımğa qayttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız