Rusiye kontrolindeki "Qırım Yuqarı mahkemesi" Canköy rayonınıñ sakinini "devlet hainligi" davasında 16 yılğa mahküm etti. Adamnı Ukrayina mahsus hızmetlerine malümat bergeninde qabaatladılar.
İşğalli Qırım prokurorlığı bunı bildirdi.
Rusiye tahqiqatınıñ versiyasına köre, adam "Ukrayina havfsızlıq hızmetiniñ temsilcisinen içtimaiy ağlardan biri vastasınen bağ tuta edi ve arbiy tehnika ve mudafaa inşaatlarınıñ yerleştirilüvi aqqında malümat toplamaq vazifesini aldı.
İşğalli akimiyetniñ bildirgenine köre, "Qırımnıñ İçki rayonında bulunıp, o, Rusiye arbiy tehnikanıñ areketleri aqqında malümat topladı ve onı Ukrayina tarafına berdi".
2026 senesi saban ayınıñ 24-nde Rusiye kontrolindeki mahkeme onı qabaatlı tanıp, sert rejimli müstemlekde 16 yılğa üküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız