Rusiye komandanlığı vaqtınca işğal etilgen Qırımda bulunğan bütün arbiylerni cebede zarar körgen bölüklerni toldurmaq içün cenk areketlerine celp ete bile.
Сenkni ögrenüv Amerika institutınıñ (ISW) maruzasında bu aqqında aytıla.
Tahlilciler, Cenübiy Ukrayina Mudafaa quvetleriniñ spikeri Vladislav Voloşınnıñ, Rusiye Qırımdaki askerlerni arbiy areketlerni alıp barğan bölüklerni toldurmaq içün qullanmağa planlaştıra, dep bildirgenine diqqat ayırdılar.
Onıñ aytqanına köre, bu arbiylerni yaralanğan arbiylerni deñiştirmek ve Rusiyeniñ Qara deñiz flotunıñ 810-ıncı ayrı deñiz piyade brigadasını toldurmaq içün yollay bileler, onıñ bölükleri Kursk yönelişinde ve "Qırım" operativ-taktik taqımınıñ terkibinde çalışa.
ISW, böyle areketler Rusiye ordusınıñ büyük ğayıpları ve yañı göñüllilerni celp etüv qıyınlıqları ile bağlı ola bile, dep tahmin ete.
Tahlilcilerniñ hatırlatqanına köre, bundan evel Rusiye arbiy komandanlığı deñiz piyade bölükleriniñ ğayrıdan teşkil etilüvini keçirgen edi. Hususan, Rusiye Federatsiyasınıñ Tınç okean flotunıñ 155-inci deñiz piyade brigadası 55-inci diviziyasına, Baltıq flotunıñ 336-ncı brigadası ise 120-inci diviziyasına deñiştirildi.
Sabannıñ 23-nde Voloşın Suspilne Qırımğa, Rusiye Baş ştabınıñ buyruğı Ukrayinanıñ bütün VİETlarına ait olğanını bildirdi.
"Bu tek Qırımdan degil, Ukrayinanıñ vaqtınca işğal etilgen diger topraqlarından da kele. Bu Donetsk, Luğansk, Herson, Zaporijjâdır. Demek ki, bütün askerlikke alınğan cenk tecribesine saip olmalı. Rusiye arbiy areketlerniñ tecribesini Ukrayina toprağında ala", — dedi o.
Maruzada qayd etilgenine köre, cenüpte Ukrayina Mudafaa quvetleriniñ qarşı ücümleri operativ vaziyetke tesir ete ve Rusiye ordusını yerlerini tutmaq içün yedeklerni köçürmege mecbur ete. Bundan ğayrı, talilcilerniñ malümatına köre, 2026 senesi saban ayınıñ başından Rusiye Donetskten ava-deñiz quvetleri ve deñiz piyade bölüklerini cenüpke yaqınlaştıra bile.
ISW müstehassıslarnıñ fikrince, bu, Rusiye komandanlığını Ukrayina qarşılıqlarını toqtatmaq ve öz istilâcı areketlerini azırlamaq arasında resurslarnı bölmege mecbur ete bile.
"Rusiye bölükleriniñ Ukrayina cenübine köçürilüvi, Ukrayina qarşılıqlı ücümlerine cevap olaraq, Rusiye komandanlığınıñ 2026 senesi baar-yaz devamında Donbass şeer-qalelerine ücüm planlarını boza bile", — maqalede denile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız