"Ateş" arbiy-partizan areketi, Rusiye Qara deñiz flotunıñ 758-inci maddiy-tehnikiy teminatı merkeziniñ Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) yaqarlıq-yağ malzemeleri bazasını teşkergenini bildirdi. O, Qırımda işğalcilerniñ arbiy tehnikası içün yaqarlıq teminatında müim rol oynay. Baza, vatandaşlarnıñ evleri yanında yerleşe.
Kiçik aynıñ 13-nde areket, öz Telegram kanalında bunı bildirdi.
Bazanıñ toprağında devamlı aqqan benzin vagonlarınıñ kütleviy faaliyeti qayd etildi. Partizanlarnıñ qayd etkenine köre, Rusiye komandanlığı anda büyük bir logistika merkezini qurmağa tırışa, çünki diger yermay bazalarına ücüm etmekten qorqa.
"Yerli sakinler endi qorqalar. İnsanlar devamlı yük maşnalarınıñ gürültüsinden ve telükesizlik içün kerçek telükeden şikâyet eteler. Rusiye komandanlığı şeerniñ sıñırlarında patlav telükesi olğan obyektni yerleştirdi, aslında ealini canlı qalqan kibi qullandı", — dep "Ateş" qayd etti.
O qoştı ki, logistika, benzin vagonlarınıñ areket cedveli ve qoruv sistemasınen bağlı bütün istihbarat malümatı Ukrayina mudafaa quvetlerine berildi.
Daa evel "Ateş" bildirdi ki, Rusiye Federatsiyasınıñ komandanlığı Qara deñiz flotunıñ yolbaşçısını deñiştirmege azırlana. Sebebi — bazalar ve gemilerniñ mudafaasında sistemaviy bozuluvlar ve Ukrayina insansız katerlerine semereli qarşılıq köstermemesidir.
Bundan evel partizanlar, işğal etilgen Qırımda Rusiye Federatsiyasınıñ komandanlığı, yarımadadaki arbiy obyektlerni qorumaq içün elit bölüklerni cebeden çıqarmağa mecbur olğanını bildirdiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız