BMT Halqara mahkemesiniñ "Ukrayina Rusiyege qarşı" davasında Rusiye Federatsiyasınıñ halqara mecburiyetlerini bozğanını tanığanından berli eki yıl keçti. 2024 senesi qara qış ayınıñ 31-nde mahkeme qırımtatar halqı Meclisiniñ faaliyetini ğayrıdan tiklemek talabını tasdıqladı. Qara qış ayınıñ 31-nde Qırımtatar resurs merkezinde bu aqqında bildirdiler.
Qara qış ayınıñ 31-nde Qırımtatar resurs merkezinde bu aqqında bildirdiler.
Mında, 2016 senesi kiçik ayınıñ 26-nda Qırımdaki işğalci mahkeme qırımtatar halqınıñ temsil organınıñ faaliyetini yasaq etip, onı "ekstremist teşkilât" olaraq tanığanını hatırlattılar.
"İşğalciler tarafından qırımtatar halqınıñ Yuqarı temsil organınıñ yasaq etilmesi halqara uquqnıñ esas qaidelerine, şu cümleden Halqara ırq ayırımınıñ bütün şekillerini yoq etüv konventsiyasına, Avropa Şurasınıñ insan aqları ve esas serbestliklerini qoruv konventsiyasına, Birleşken Milletler Teşkilâtınıñ tamır halqlar aqları beyannamesine aqsız yanaşuv ve bozuvdır", — dep QRM beyanatında aytıla.
Buña baqmadan, Rusiye halqara mahkemeniñ qararını yerine ketirmegeninden ğayrı, Meclis azalarına qarşı repressiyalarnı devam ete, dep uquq qoruyıcılar qayd ettiler. Rusiye Federatsiyası territoriyasında bu organnıñ bir çoq azasına qarşı cinaiy ya da memuriy davalar uydurılğan.
Merkezniñ taqımı halqara teşkilâtlarnen beraber qanunsız yasaqnıñ lâğu etilmesi içün küreşkenini bildirdi. Böyleliknen, QRM yardımı ile Avropa insan aqları mahkemesine bu meselede 17 şahsiy ariza berildi.
Aynı zamanda Ukrayinada "Ukrayinanıñ tamır halqları aqqında" qanunğa köre Meclisniñ uquqiy statusı alâ daa belgilenmegen.
"Ukrayina seviyesinde bizim uquqçılarımız 2023 senesi ekim ayınıñ 6-ndan bugünge qadar Ukrayina Nazirler Kabinetinde bulunğan tamır qırımtatar halqınıñ temsiliy organı olaraq uquqiy statusınıñ pekitilmesi içün Meclisniñ vesiqalarını azırlamağa yardım ettiler", — dep QRM-de qayd ettiler.
Hatırlatamız, 2025 senesi ekim ayında Avropa insan aqları mahkemesi, 2016 senesi Qırımnıñ işğalci akimiyeti tarafından kirsetilgen Qırımtatar Milliy Meclisiniñ yasaq etilmesi boyunca davalarda resmiy şekilde muracaat etip başladı. Mahkeme muracaatlarını em qırımtatarlarnıñ temsil organları, em de ayrı vatandaşlar berdi.
"Ukraina Rusiyege qarşı (Qırımnen bağlı)" davası aqqında ne bilemiz
2020 senesi ilk qış ayında Avropa İnsan aqları makemesi (AİAM) bu davanı baqmaq içün maqbul olaraq tanıdı ve 2014 senesi kiçikniñ 27-nden berli Rusiye yarımadanıñ semereli nezaretini alıp barğanını tasdıqladı.
Dava 2019 senesi berim ayınıñ 11-nde ve 2023 senesi ilk qış ayınıñ 13-nde baqıldı. Soñki diñlevlerde tek Ukraina akimiyetiniñ vekilleri bar ediler, Rusiye akimiyetiniñ vekilleri yoq ediler.
Rusiye 2022 senesi mart ayında Ukrainağa qarşı cenk açqanı içün Avropa Şurasından (AŞ) çıqarıldı. 2022 senesi berim ayınıñ 16-ndan itibaren Rusiye resmiy olaraq Avropa makemesiniñ tarafı olmağa vazgeçti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız