İşğalli "Qırım devlet şurası" Olga Şevtsovanıñ "Nazirler şurası reisiniñ muavini" vazifesine tayin etilmesine razı oldı. 2025 senesi ilk qış ayında Ukrayinada onı devlet hainligi içün 14 yılğa mahküm ettiler. Bundan evel o "Qırım ekologiya naziri" vazifesini eda ete edi.
Qara qış ayınıñ 23-nde Telegramda işğalli "Qırım devlet şurası"nıñ matbuat hızmeti işğalli Qırım akimiyetindeki hadimlerniñ deñişmeleri aqqında bildirdi. Şevtsovadan evel Aksönovnıñ "muavinleri"nden biri Svetlana Maslova edi.
"Mebuslar Olga Şevtsovanıñ Qırım Cumhuriyeti ekologiya ve tabiat resursları naziri — cumhuriyetniñ baş devlet inspektorı vazifesinden boşatılmasını qabul ettiler. Olga Şevtsovanıñ Qırım Cumhuriyeti Nazirler Şurasınıñ reisiniñ muavini vazifesine tayinlenüvi qabul etildi. Qabul etilgen qararlarğa köre, parlament vekilleri Svetlana Maslovanı işten boşatmağa razı oldılar", — dep haberde qayd etildi.
Olga Şevtsova aqqında ne bilemiz
Olga Şevtsova 1984 senesi çiçek ayınıñ 29-nda Yevpatoriyada (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) doğdı.
2008 senesinden 2012 senesine qadar ekologiya ve tabiat qoruv faaliyetinen bağlı çeşit bölüklerde baş mütehassıs — devlet inspektorı olıp çalıştı. Soñra işğalli "operativ ekologik nezaret idaresi"niñ yolbaşçısı oldı.
2021 senesi Şevtsova Qırım ekologiya ve tabiat resursları naziri vazifesine tayinlendi.
Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığınıñ 2025 senesi ilk qış ayınıñ 15-nde bergeni malümatqa köre, Ukrayinada işğalli Qırım "Ekologiya naziri" ğıyabiy şekilde 14 yılğa mahküm etildi. Açıq menbalardan belli olğanı kibi, söz bu "işni" alğan Olga Şevtsova aqqında kete.
"İşğalli vazifede mahküm etilgen qadın bir qaç kere Rusiye Federatsiyası Naqliyat naziriniñ teşekkürnamesini, "Qırımnıñ Rusiyege qoşulğanınıñ beşinci yıllığı munasebetinen" medalini ve "Tabiat qoruvınıñ namzeti" şerefini aldı. Böyleliknen, o, yarımadada işğalli akimiyet organlarınıñ çalışmasını temin ete ve istilâcı devletniñ vekillerine Ukrayinağa qarşı bozuv faaliyetini alıp barmaqta yardım ete", — dep prokurorlıq bildirdi.
2025 senesi ilk küz ayında prezident Zelenskıy Olga Şevtsovağa qarşı şahsiy sanktsiyalar kirsetti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız