Qırım işğal etilgen soñ 10 yıl devamında RFnıñ işğalli akimiyet organlarında çalışqan Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeer şurasınıñ V ve VI-ncı çağırılışlarınıñ sabıq mebusı devlet hainligi içün ğıyabiy şekilde mahküm etildi. O 11 yıllıq apis cezasını aldı.
Qırım Muhtar Cumhuriyeti ve Sevastopol (Aqyar) şeeri prokurorlığınıñ saytında bu aqqında haber etildi.
Uquq qorçalayıcı organlarındaki haberdar olğan menba Suspilne Qırımğa söz Yevheniy Dubovık aqqında ketkenini anonim şekilde bildirdi.
"Prokurorlar, 2014 senesi saban ayında adam Ukrayina Anayasasınıñ talaplarına zıt olaraq "Umumiy Qırım referendumınıñ keçirilmesinde iştirak etüv" ve "Qırım MC ve Sevastopol (Aqyar — terciman) şeeriniñ mustaqilligi aqqında beyanname"niñ qabul etilmesi içün rey bergenini isbatladılar. Bundan soñ o, bir sıra diger qanunsız qararlarnı tasdıqladı. Hususan, "Qırım Cumhuriyeti"niñ meydanğa ketirilmesi, Rusiyege muracaat etip, Sevastopol (Aqyar — terciman) şeerini onıñ terkibine qabul etmege teklif etüv, Sevastopol (Aqyar — terciman) şeer şurasınıñ adını "Sevastopol şeeriniñ qanun çıqarıcı toplaşuvı" olaraq deñiştirüv", — dep haberde qayd etildi.
UHHniñ Qırım Muhtar Cumhuriyetindeki Baş idaresi, mahküm etilgenniñ 10 yıl devamında işğalli akimiyette çalışqanını qoştı.
"Şu cümleden, işğalli Sevastopol (Aqyar — terciman) vitse-gubernatorı vazifesini eda etti ve qanunsız şekilde teşkil etilgen "Sevastopol şeeriniñ qanun çıqarıcı toplaşuvları"nda iqtisadiyat eyyetiniñ yolbaşçısı edi", — dep UHH añlattı.
Ukrayina milliy havfsızlıq ve mudafaa şurasınıñ qararınen mahküm etilgen şahsiy sanktsiyalarğa oğradı.
"Mahkeme havfsızlıq hızmetiniñ taqiqatçıları tarafından toplanğan delillerge esaslanıp, qabaatlı şahısnı Ukrayina Ceza qanunnamesiniñ 111-inci maddesiniñ 1-inci qısmına istinaden (devlet hainligi) qabaatlı dep tanıdı. O, 11 yılloq apis cezasını aldı. Cinayetçi Ukrayina nezaretinde olmağan topraqta bulunğanı içün, oña qarşı yapılğan cinayetler içün mesüliyetke çekmek içün kompleks tedbirler alına", — dep UHHniñ Qırım MCdeki Baş idaresi bildirdi.
Qırım MC ve Sevastopol (Aqyar) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Yevheniy Dubovık aqqında ne bilemiz
1955 senesi ilk küz ayınıñ 30-nda Habarovsk vilâyetiniñ Sovet Gavan şeerinde arbiy hızmetçiniñ qorantasında doğdı. 1973 senesi Arhangelsk-55 şeerinde orta mektepni bitirdi.
1978 senesi Kıyiv aliy arbiy-deñiz siyasiy oquv yurtunı bitirdi. 1992 senesi V. İ. Lenin adına arbiy-siyasiy (arbiy-gumanitar) akademiyasını bitirdi.
1973 senesi boş aydan 2000 senesi ilk qış ayına qadar SSCB ve Rusiye Federatsiyasınıñ Silâlı quvetlerinde arbiy hızmetni eda etti: Nova Zemlâ adası özek poligonında; 150-inci raketa gemileri brigadasınıñ gemilerinde; Qara deñiz flotunıñ alâqa bölüginde; Rusiye Federatsiyasınıñ Qara deñiz flotunıñ REB polkında. Rezervdeki ekinci derece kapitanı.
Askerlikten çıqqan soñ çalıştı:
- 2001 senesinden 2014 senesine qadar Qara deñiz flotunıñ gidrografik hızmetinde 1-inci kategoriya okeanologı ve "MARS-75" radionavigatsiya stantsiyasınıñ baş müendisi;
- 2014-2016 seneleri — "Sevastopol şeeri gubernatorınıñ muavini" vazifelerini eda etken edi;
- 2017 senesinden 2019 senesi ilk qış ayına qadar — Rusiye Federatsiyası gidrografik hızmetiniñ müendisi.
- 2006-2014 seneleri — Sevastopol (Aqyar) şeer şurasınıñ V ve VI-ncı çağırılışnıñ mebusı, "Narodnaya oppozitsiya" fraktsiyasınıñ reisi.
- 2019 senesi ilk küz ayından itibaren - işğalli "Sevastopol şeeri qanun çıqarıcı meclisiniñ iqtisadiyat meseleleri daimiy eyyeti"niñ reisi.
- 2016 senesi boş aydan başlap — "Spravedlivaya Rossiya" siyasiy firqasınıñ Sevastopol (Aqyar) şeerindeki bölge bölüginiñ yolbaşçısı. "Spravedlivaya Rossiya — vatanperverler — aqiqat içün" Sotsialistik siyasiy firqasınıñ Sevastopol (Aqyar) şeerindeki bölge bölüginiñ şurasınıñ reisi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız