Herson vilâyetiniñ Geniçesk şeerindeki işğalli mahkeme 47 yaşındaki qırımtatar Eldar Karamurzayevni Noman Çelebicihan batalyonı davasında sert rejimli müstemlekede sekiz yılğa üküm etti. O, Herson ve Zaporijjâ vilâyetleriniñ yañı işğal etilgen topraqlarında bu dava boyunca 30-ncı mabüs oldı.
Qırımtatar Resurs Merkeziniñ idare reisi, Qırımtatar Milliy Meclisiniñ azası Eskender Bariiev bunı bildirdi.
Onıñ aytqanına köre, qarar 2025 senesi ilk qış ayınıñ 12-nde Geniçeskteki işğalli memuriyet mahkemesi tarafından qabul etildi. Eldar Karamurzayev 2025 senesi kiçik aynıñ 25-te evinde qanunsız tintüvden soñ tutuldı. İşğalli akimiyet taqip içün sebep olaraq "adamnıñ Noman Çelebicihan adlı qırımtatar göñülli batalyonında iştirak etmesi"mi ve "Qırımnıñ iqtisadiy qamaçavına yardım etmesi"ni adlandırdı.
"Eldar, 2-nci dereceli saqat (serebral palsi) bir ayağınen sıqışıp tura. Serbest olğanda er vaqıt ayağından qıyınlıqlar duya edi ve ağır fizikiy işlerni yapıp olamay edi", — dep Eskender Bariiev qayd etti.
O şunı da qayd etti ki, tutuluvdan soñ işğalciler adamnıñ FIAT maşinasını tehnikiy pasportınen beraber alıp kettiler.
Karamurzayev 2014 senesine qadar Canköyde yaşadı, Qırım işğal etilgen soñ ise qorantasınen beraber Jıtomırğa köçti, soñ Qırımğa daa yaqın olğan Novooleksiyivka qasabasına köçti. Bariievniñ aytqanına köre, SİZOda qanunsız tutulğan doquz ay devamında tek bir qaç resmiy mahkeme oturışı keçirildi, dava bütünley sahteleştirildi, adamnı ise iç bir alâqası olmağan bir cinayette qabaatladılar. Eldarnıñ esli-başlı anası, Geniçesk rayonındaki "uquq qorçalayıcı organları"na muracaat etip, bir qaç ay devamında oğlunı qıdırmağa tırışa edi, lâkin işğalciler onıñ bulunğan yeri aqqında malümatnı bilerek gizley ediler.
Eskender Bariiev şunı da hatırlattı ki, umumen Noman Çelebicihan batalyonı davasında işğalciler 73 Ukrayina vatandaşını yaqaladılar: 21-i — işğal etilgen Qırımda ve 52-si — 2022 senesinden soñ yañı işğal etilgen topraqlarda. Qırımda endi yedi kişi mahküm etildi, Herson ve Zaporijjâ vilâyetleriniñ SİZOsında Karamurzayev bu dava boyunca 30-ıncı mahküm oldı.
"Noman Çelebicihan adına batalyonnen alâqası bar olğanında qabaatlanıp, işğalciler tarafından yaqalanğan 73 kişiden iç birisi azat etilmedi ya da deñiştirilmedi. Qırımtatar Resurs Merkeziniñ Ukrayina devlet organlarına, bu dava boyunca yaqalanğanlarnıñ episi, III Jeneva Şartnamesine köre, deñiştirüvge lâyıq olğan cenk esirleri olaraq tanılmaq kerek, dep uquqiy tasnif bergenine baqmadan", — dep Bariiev qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız