Boş aynıñ 15-nden 16-na keçer gecesi Rusiye quvetçileri işğal etilgen Qırımnıñ Alabaş Qoñrat köyünde 65 yaşındaki Seithalil Fahriyev ve onıñ 36 yaşındaki oğlu Ruslannı evinde tuttılar. O vaqıttan berli ekisiniñ bulunğan yeri belli degil.
Qırımtatar Milliy Meclisi bu aqqında haber etti.
Yaqalanma gecesi, apayı ve anası Ayşe Fahriyevanıñ közü ögünde yapıldı. Bundan soñ o, ağır alda hastahanede yata.
Meclisniñ malümatına köre, apiske alınğan soñ bir qaç kün devamında soy-sopları ve qomşuları rus quvetçileriniñ baba ve oğlunı qayda alıp ketkenlerini bilmey ediler. Tutulğanlarnıñ bulunğan yerleri daa belli degil.
"Qırımdan kelgen ayrı haberlerge köre, işğalli Rusiye akimiyeti Seithalil Fahriyev ve oğlu Ruslanğa Rusiye Ceza qanunnamesiniñ 205 maddesine istinaden qabaatlavlar qoyğan — "terroristik areket", — dep Meclis qayd etti.
Fahriyevler Qırımğa sürgünlik yerlerinden 1990 senelerniñ başında qaytıp, Alabaş Qoñratta yaşay. Qomşuları olarnı yahşı, açıq ve yardımsever insanlar olaraq tanıy.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız