İşğal etilgen Qırımda insanlarnıñ ğayıp oluvı arta, Rusiye mahkemeleri qırımlılarğa qarşı qanunsız qararlarnı qabul etmege devam ete — hususan, Ukrayina vatandaşı "terakt azırlağanı" içün 10 yılğa qadar apis cezasına mahküm etildi.
Suspilne Qırım işğalciler tarafından yarımada sakinleriniñ soñki afta devamında taqip etilüvi aqqında malümat topladı.
Qırımda bir ay evelsi Marat Batırovnıñ dairesinden hırsızlandı. Onıñ bulunğan yeri alâ daa belli degil — QRM
İşğal etilgen Qırımnıñ Yalta rayonınıñ Qızıltaş köyünde orta küz ayınıñ 2-nde yerli sakin Marat Batırov dairesinden hırsızlandı. Bir aydan berli onıñ bulunğan yeri aqqında iç bir malümat yoq.
"Qırımnıñ sözde uquq qorçalayıcı organlarınıñ vekilleri, Batırov Marat yarımadanıñ iç bir SİZOsında olmağanını bildireler. Advokatnıñ işğalli Feodosiya (Kefe — terciman) polisiniñ polkovnigi Fomin Y.O., em de işğalli Qırım Cumhuriyeti İçki işler naziri Dmitriyev A.P.niñ yaşağan yeri aqqında yazılı suallerine er vaqıt olğanı kibi iç bir añlayışlı cevap berilmedi", — dep QRMniñ reisi qayd etti.
Aynı zamanda o qayd etti ki, Rusiye quvetçileri SİZOda mahsus odalarda, mağazlarda ve ameliy dairelerde saqlap, inkommunikado statusında olğan insanlarnı zorbalıqnen tutmağa devam etecek. Anda hırsızlanğan vatandaşlarnı, kerekli şaatlıqnı elde etmek içün, işkencege oğratalar.
Bariievniñ aytqanına köre, Batırov — sabıq deñiz piyadesi. O, 45 yaşında pensiyağa çıqtı.
Rusiye mahkemesi ukrainalını "terakt azırlağanı" içün 10 yıl koloniyada qalmasına üküm etti
Rostov-na-Donudaki Cenübiy okrugınıñ arbiy mahkemesi onı qabaatlı tanıp, 10 yıl sert rejimli koloniyada qalmasına ve 300 biñ ruble para cezasını almasına üküm etti. Apellâtsion mahkemeler ükümni deñiştirmedi.
Sevastopolda (Aqyarda) FSB hadimleri tarafından tutuldı. Erkekke qarşı "patlayıcı maddelerniñ qanunsız saqlanuvı" ve "terroristik areketlerniñ azırlanuvı" boyunca cinaiy işler açıldı.
Rusiye uquq qoruyıcılarınıñ malümatına köre, adam işğal etilgen Sevastopolda (Aqyarda) bulunıp, "USQniñ MOQden öz başına yapılğan patlayıcı aletlernen saqlanğan yerniñ koordinatlarını aldı". O, "Rusiye arbiyleri ve Zaporizhzhâ vilâyetiniñ yolbaşçısınıñ maşinasını patlatmağa planlaştıra edi".
Qırım işğali başlağanından berli 473 siyasiy mabüs ve cinaiy "vaqialar" boyunca taqip etilgenler qayd etildi — QRM
Uquq qoruyıcılarnıñ malümatına köre, 473 adamdan:
- mahküm etilgen ve koloniyada ceza çekkenler — 226 (127 — qırımtatarı);
- sıñırlav ya da sınav müddeti olğanlar — 56 (30 — qırımtatarı);
- SİZOda bulunğanlar — 91 (47 — qırımtatarı);
- işten boşatılğanlar — 63 (36 — qırımtatarı);
- 37 kişi (28 — qırımtatarı) taqip etile.
Bundan da ğayrı, QRM temsilcileri boş aynıñ 4-nde Ukrayinada insan aqları boyunca OON nezaret missiyasınen körüştiler, onıñ tafsilâtları aq qorçalayıcılar tarafından boş aynıñ 7-nde aydınlatıldılar.
Merkezniñ idare reisi Eskender Bariyev qırımtatar, qaray ve qırımçaqlar aqlarınıñ bozuluvını qayd etüv boyunca sistematik işlerine diqqat çekti. O, repressiyalarnıñ yañı tendentsiyalarını da qayd etti.
"İşğalciler insanlarnı inkommunikado statusında tutalar — insan hırsızlanıp, tuvğanları onıñ bulunğan yerini ve qabaatını çoq vaqıt bilmey. Tutulğanlarnıñ tuvğanları süküt tutalar, çünki tintüv vaqtında işğalciler susmaq içün azat etilmege vade eteler, amma bu öyle de olmay", — dep aytıla haberde.
Bariyev Qırım siyasiy mabüsleriniñ Rusiye vatandaşlığından marum etilüvine diqqat çekti, bu da Orta Asiya memleketlerine sürgün etilüv telükesini yarata.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız