Ukrayina prezidentiniñ Qırım Muhtar Cumhuriyetindeki temsilciligi orta küz ayınıñ 23-nde gece tintüvden soñ kör Qırım siyasiy mabüsi Oleksandr Sizikovnıñ tekrar apiske alınğanını takbih etti.
Temsilcilikniñ resmiy beyanatında bu qayd etildi.
"Temsilcilik işğalli Rusiye rejimi tarafından Ukrayina vatandaşlarınıñ taqip etilmesini takbih ete ve Oleksandr Sizikovnıñ acele azat etilmesini talap ete. Oleksandr Sizikovnıñ tekrar apiske alınması halqara gumanitar uquq ve insan aqları qaideleriniñ qaba bir bozuluvıdır", — dep temsilcilik qayd etti.
O qoştı ki, IV Jeneva artnamesine binaen, işğalci devletniñ işğal etilgen topraqta cinaiy qanunlarını qullanmağa, onıñ sakinlerini siyasiy ya da diniy baqışları içün taqip etmege ve vatandaş ealisini serbest apiske almağa aqqı yoq.
"Temsilcilik halqara teşkilâtlarnı, çetel devletlerniñ ükümetlerini ve uquq qorçalayıcı institutlarnı vaqtınca işğal etilgen yarımadada insan aqlarınıñ muntazam bozuluvını toqtatmaq ve Qırım ve Rusiye toprağında qanunsız tutulğan bütün ukrayin siyasiy mabüslerini azat etmek maqsadınen Rusiyege basqını quvetleştirmege çağıra", — dep beyanatta bildirildi.
Hatırlatamız ki, orta küz ayınıñ 23-nde gece işğal etilgen Qırımnıñ Bağçasaray rayonında "polis" Sizikovnıñ evini tintip, onı yaqaladı. Bundan evel Krasnoyarsk vilâyet mahkemesi onı azat etüv qararını lâğu etip, apishanege qaytarmağa qarar berdi.
2025 senesi mayısnıñ 26-nda Rusiye Federatsiyasınıñ Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı apislikten boşatqanı belli oldı. O, Qırımğa qayttı.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
2025 senesi mayıs ayınıñ 26-nde belli oldı ki, Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı azat etti. O, Qırımğa qayttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız