Yuqarı Şuranıñ insan aqları vekâletlisi Dmıtro Lubinets, BMTnıñ İqtisadiy, içtimaiy ve medeniy aqlar eyyetiniñ (CESCR) Rusiye Federatsiyasınıñ vaqtınca işğal etilgen topraqlarda, şu cümleden Qırımda içtimaiy-iqtisadiy ve medeniy aqlarnıñ ciddiy bozuluvı içün mesüliyetini tasdıqlağan vesiqağa izaat berdi. O qayd etti ki, Ukrayina "kerçekni aytmalı, bozuvlarnı qayd etmeli ve istilâcığa ceza bermeli".
Orta küz ayınıñ 9-nda o, Telegram kanalında bunı bildirdi.
"Bu deliller vaqtınca işğal etilgen topraqlarda insan aqlarınıñ bozuluvı ne qadar ciddiy olğanını köstere ve ukrayinlerni qorçalamaq içün halqara toplulıqnıñ acele kirişmek kerekligini qayd ete. İşğalniñ er künü yañı cinayetler ve insanlarnıñ azapları demektir. Şunıñ içün bizim borcumız — aqiqatnı aytmaq, bozuvlarnı qayd etmek ve istilâcığa ceza bermege tırışmaqtır", — dep Lubinets bildirdi.
Ukrayina ombudsmanınıñ qayd etkenine köre, işğal etilgen Qırım insan aqlarınıñ devamlı ve muntazam bozuluvınıñ merkezi olıp qala.
"Er kün sakinleri basqı, qorquzuv ve esas içtimaiy, iqtisadiy ve medeniy aqlarınıñ sıñırlanması, işğalli quvetler tarafından taqip, qanunsız apis ve repressiyalarnıñ qurbanları olalar", — dep qayd etti o.
Hatırlatamız ki, Qırımtatar resurs merkeziniñ (QRM) malümatına köre, 2025 senesiniñ doquz ayı devamında yarımadada 100-den ziyade insan yaqalandı, aman-aman 180 apiske alındı ve onlarnen diger insan aqları bozuluvı qayd etildi.
QRMniñ idaresiniñ reisi Eskender Bariiev bildirdi ki, tintüv ve tevqiflerniñ bir qısmı gece keçirile, mustaqil advokatlar ise basqı ve "meseleniñ sessizce çezilmesi" çağıruvlarına rastkeleler.
O, 2024-2025 seneleri olğan tendentsiyalarğa da diqqat çekti: "devlet hainligi" sebebinden tutulğanlarnıñ sayısı arttı, "Rusiye arbiy hızmetçilerini itibardan tüşürüv" ise taqiplerniñ ekinci kategoriyası oldı.
Hatırlatamız ki, orta küz ayınıñ 8-nde Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığı ve Ukrayina prezidentiniñ Qırım Muhtar Cumhuriyetindeki temsilciligi "Qırımda cenk cinayetleri" malümat leyhasını taqdim etti. Onıñ maqsadı, işğal etilgen yarımada sakinlerine, olarğa yapılğan areketler cenk cinayeti ola bilgenini añlatmaq ve aqlarını nasıl qorçalamaq mümkün olğanını añlatmaqtır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız