Orta küz ayınıñ 6-nda Ukrayina Tış işleri nazirliginiñ desteginen Ukrayin institutı tarafından teşkil etilgen Medeniy diplomatiya halqara forumı çerçivesinde "Хвиля/Dalga" mukâfatınıñ tesis etilmesi ve ilk berilmesi olıp keçti. Mukâfat ukrayin ve qırımtatar tilleriniñ dünyada populârlaştırılması içün berile. Mukâfat içün 18 memleketten 44 namzet yarışqan edi.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
Ukrayina tış işleri naziri Andriy Sıbiğa mukâfatnı şimdi teşkil etmek müimligini qayd etti.
"Bugünki kerçeklerde ukrayin ve qırımtatar medeniyetlerini pekitmek — tamırlarımıznı ve kimligimizni deñiştirmeknen bağlı, til ise — bu kimlikniñ esas elementidir", — dep Sıbiğa bildirdi.
Ukrayin institutınıñ müdiriniñ muavini Alim Aliyev, medeniy teşebbüsler vastasınen tillerni desteklemek müimligini qayd etti.
"Bizler insanlar dünyağa ukrayin ve qırımtatar sözüni ketirsin dep elimizden kelgenini yapamız", — dep Aliyev qayd etti.
Lviv politehnika milliy universitetiniñ tasil, medeniyet ve diasporanen alâqalar halqara institutınıñ müdiri İrına Klüçkovska ukrayin tiliniñ dünyağa tarqatıluvında iştirak etken er kesniñ — arbiy hızmetçi, oca, göñülli ve medeniyet erbaplarınıñ rolüni qayd etti.
Qırımtatar Milliy Meclisiniñ reisi Refat Çubarov qırımtatar tiliniñ on yıllarnen devam etken repressiyalardan soñ ğayrıdan tiklenmesiniñ qıyın olğanını hatırlattı ve bu esnasta devletniñ destegini qayd etti.
"Ukrayina devlet tiliniñ inkişafı ve işletilmesi, Ukrayina tamır halqlarınıñ tilleriniñ inkişafı — bular kerçekten de yapqanımıznıñ qorçalavına doğrultılğan areketlerdir. Bu bizim qalqanımız, ve onı qayğırağanımız qadar, yaşaycaqmız", — dep Çubarov ayttı.
Mukâfatnıñ ilk laureatları:
- Marta Yenkala — London Universitetiniñ kollecinde ukrayin tili ocası;
- Nariye Seydametova — İstanbul universitetinde qırımtatar tili ocasıdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız