Keçenlerde işğalcilerniñ vatandaş naqliaytı, içtiamiy obyektler, kommunal ve acil hızmetlerniñ ihtiyacları içün benzit taminatında prioritetli olğanını qayd etkenlerine baqmadan, işğal etilgen Qırımda vatandaş naqliyatınıñ marşrutlarınıñ sayısı qısqartıla.
USQniñ Mahsus operatsiyalar quvetleriniñ bölügi olğan Milliy muqavemet merkezi bu aqqında haber berdi.
"Yaqarlıq qıtlığı sebebinden vaqtınca işğal etilgen Qırım MCde vatandaş naqliyatınıñ sayısını qısqartıla. İşğalli akimiyetniñ fikirlerine köre, qıtlıqnıñ faizi ihtiyaclardan 56%-ni teşkil ete. Yaqarlı sıñırlanıp berile — bir hızmetçige 20 litr berile, benzin stantsiyalarınıñ çoqusı qapalı. Ordu ve memuriyetniñ prioriteti bar, bunıñ içün yerli sakinler sıñırlavlarğa alışmaq mecburlar: uzun nevbetler, siyrek marşrutlar, daa az sefer", — dep bildirildi.
Hatırlatamız ki, keçenlerde Qırımnıñ işğalli başı Sergey Aksönov bildirdi ki, işğal etilgen yarımadanıñ sakinlerine daa az yaqarlıq satmağa, yani bir künde maksimum 20 litr satmağa, qarar aldılar. Aynı zamanda o inandırdı ki, "vatandaş maqliyatı, içtimaiy obyektler, kommunal ve acil hızmetler tamamınen temin etilgen".
Aynı zamanda "Birleştirilgen haberler" telemarafonınıñ canlı yayınında USQniñ ADQniñ nutuqçısı Dmıtro Pletençuk ayttı ki, yaqın kelecekte işğal etilgen Qırımdaki yaqarlı qıtlığı yarımadadaki rusiye ordusına da tesir etecek.
"Olarnıñ Ukrayinanıñ cenübiy işğal etilgen topraqlarında qurğanları demiryolnı qullanuvnen bağlı meseleler bar. Oña ücüm yapıldı. Sözde Qırım köpründen de fıçılarnen ketemezler. Qırımğa bazıda yaqarlıq ketirilse de, qıtlıq daa çoq duyulır. Orduda da, elbette, duyulır. İstisalnıñ bir qısmı, yani tahminen 25%-i bozulsa, bu er saada duyulır", — dep Pletençuk bildirdi.
"Qırım yeli" Telegram kanalınıñ malümatına köre, şimdi işğal etilgen Qırımda büyük şeerlerde degil, yarımadanıñ çöl qısmında, Qurman rayonında, kritik yaqarlıq qıtlığı duyula. Aynı zamanda benzin talonlarını ve benzin stantsiyalarındaki nevbetlerge yerlerni satqan spekulântlar da bar.
Yaqarlıq tapmaq içün yarımadanıñ sakinleri yerlerge keteler, bir yerde toqtamamaq içün daa ucuz yerlerden yaqarlıq alalar. Qurman rayonındaki nevbetler ise "ayrı bir zevk": "bir litr içün 95 rublelik" АІ-95ni almaq içün saatlerce turalar. Büyük şeerlerde birinciden eer şey yahşı olğanı körüne, rusiye akimiyeti benzinniñ olğanı benzin stantsiyaları cedvelini de yayınlay. Aynı zamanda internette tek benzin talonlarını degil, benzin stantsiyalarındaki nevbetlerge yerlerni de satmağa başladılar", — deo kanal abunecileri bildirdiler.
Aynı zamanda orta küz ayınıñ 1-nde işğal etilgen Feodosiyada (Kefede) aydavcılarnıñ olmağanı sebebinden vatandaş naqliyatınıñ üç marşrutı lâğu etildi. Laf 2-nci, 4-nci, 7-nci marşrutlar aqqında kete. "Krımtrolleybus" işğalli müessisesi tanıdı ki, aydavcılar yetmey, çalışqanlar ise hastalandılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız