2025 senesi Rusiye, RF toprağına ve işğal etilgen Qırımğa ukrayin balalarını zorbalıqnen alıp ketken müessiseler ağını bayağı kenişletti. Bu yılnıñ tek sekiz ayı içinde ruslar aman-aman 11 biñ balanı 164 lagerge sürgün ettiler.
"İnsan aqları bölge merkezi" CTnıñ baş uquqçısı Kseniya Korniyenko ukrayin balalarınıñ sürgünligi ve mecburiy yerleştirilüvi aqqında tedqiqatnıñ taqdim etilmesi vaqtında bunı ayttı.
Onıñ qayd etkenine köre, Rusiye gençlerniñ sürgün etilüvini "reabilitatsiya" ve "tatil" laflarınen gizley, amma kerçekte Rusiye ükümeti tarafından idare etilgen terbiye lagerleriniñ ağı aqqında söz yürsetile.
Uquq qorçalayıcınıñ aytqanına köre, Rusiye siyaseti bir çoq seviyede amelge keçirile: federal qurulışlardan başlap bölge hızmetçilerine, işğalcl memurlarğa, lager yolbaşçılarına ve atta şahsiy teşkilâtlarğa qadar.
"O birisi künü", "Universitet deñişmeleri", "Asker", "AHMAT Halqlar dostluğı akademiyası", "Genç qaramanlar saati", "Yañı ufuqlar", "Medeniyet haritası 4+85" kibi müessiselerde faaliyet köstergen teşviqat programmaları hususiy rol oynaylar. Olarnıñ maqsadı — balalarnıñ arbiyleştirüvi, medeniy assimilâtsiyası ve Rusiye tasil leyhalarına qoşulmasıdır.
Uquq qorçalayıcılar hatırlattılar ki, balalarnıñ Qırım ve Rusiyege alıp ketilmesi 2014 senesinden berli qayd etile, lâkin tolu miqyaslı istilâ başlanğan soñ bu adise sistemalı ve kütleviy bir hususiyetke malik oldı, bu ise Rusiye Federatsiyasınıñ maqsatlı siyasetiniñ bütün alâmetlerini taşıy.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız