Arman ayınıñ 29-nda Novorossiysk civarında yüz bergen yaqarlıq tökülmesi işğal etilgen Qırımnıñ yalısına yaqınlaşa. Uydular onıñ areketini qayd etti.
Greenpeace bu aqqında haber etti.
"Uydulardan alınğan resimlerge köre, mütehassıslar tarafından tetqiq etilgen soñ, yaqarlıqnıñ meydanlığı 50 kvadrat metrni teşkil ete edi. Üç kün devamında o, Novorossiyskten Anapa yalısı boyunca keçip, Keriç boğazına yaqınlaştı", — dep haberde qayd etildi.
Greenpeace mütehassıslarınıñ qayd etkenlerine köre, Rusiye tabiat nezaretiniñ yaqarlıqnıñ tökülmesi toqtatılğanı ve onıñ tarqaluv telükesi yoq degen iddiaları yañlış.
"Yalı yanında olğan nevbetteki neft tökülmesi Rusiyede ekologik telükesizlikniñ neft biznesi içün zarar köstere. Akimiyet ve nezaret organları bozuluvlarğa köz yumıp, neft şirketlerine adiseler aqqında malümatnı gizlemege yardım ete, cemaat nezareti ise, vatandaş cemiyetine qarşı basqı sebebinden pek zayıflaştı. Daimiy qazalar ve tökülmeler şimdiki Rusiye rejimi içün tabiat ve vatandaşlarnıñ havfsızlığından ziyade yermay kârı müim olğanını köstere", — dep Greenpeaceniñ Merkeziy ve Şarqiy Avropa mütehassısı Dmıtro Markin tefsir etti.
Hatırlatamız ki, Arbiy deñiz quvetleriniñ nutuqçıcı Dmıtro Pletençuk Suspilne Qırımğa tasdıqladı ki, tökülüv Rusiyeniñ kontroli altında olğan Qara deñizniñ şarqiy qısmında oldı.
Bundan ğayrı, hatırlatamız ki, TASS Rusiye devlet agentliginiñ malümatına köre, arman ayınıñ 29-nda Novorossiysk limanında tankernen yük operatsiyası vaqtında neft mahsulatı çıqqanı qayd etildi.
Deñiz qurtaruv hızmetinen işbirlik tutqan uzaqtan teşkerüv usullarınıñ mütehassısı Serğiy Stanıçnıy TASS agentligine bildirdi ki, "(lekeniñ - muar.) milliy meydanlığı 350 kvadrat kilometr teşkil ete, Anapadan ğarpta yerleşe, Anapadan şimal yalığa az çıqa bilie. Bu leke Qırımğa doğru kete, amma şimdilik Keriç boğazınıñ cenübinden keçe", — dep beyanatta qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız