İşğal etilgen Qırımda bir qaç aftadır yoq olğan A95 benzini kene peyda oldı, amma onıñ yañı fiyatı — litr içün 70,79 ruble. Eki afta içinde yaqarlıq fiyatı 2%-ge paalılaştı.
Qırım.Aqiqat bunı bildirdi.
Teñeştirmek içün, arman ayınıñ 10-nda litr içün A95niñ fiyatı 69,35 ruble edi, yani eki afta içinde fiyat 1,44 rublege arttı.
"Bu asırda Qırımda benzin fiyatlarınıñ böyle tez artması daa olmağan edi, amma qomşu Rusiye ve işğal etilgen Qırımnıñ yaqarlıq saası içün yaramay şaraitni köz ögüne alsaq, tahmin etmek mümkün ki, yaqında benzin fiyatlarınıñ rekord artması da yıqılır", — dep Qırım.Aqiqatqa adını bildirmege istemegen #LiberateCrimea halqara kampaniyasınıñ faalcisi ayttı.
Onıñ aytqanına köre, yaqarlıqnen bağlı vaziyet Rusiye iqtisadiyatında ciddiy meseleler bar olğanını köstere ve cenk aqibetlerini aks ettire.
"Benzinci olğan devlette benzinniñ adiy aydavcılar içün itişam olğanı şaşırtacaq bir şey. Bu Ukrayina cenkte yutquzmaycağını, aksine, istilâcı memleketniñ iqtisadiyatını kolapsqa yaqınlaştırğanını isbatlay. Yaqarlıq — iqtisadiyatnıñ qanıdır, bugünki tendentsiyalarğa köre Rusiye iqtisadiyatı daa ziyade qansızlana", — dep qoştı o.
Hatırlatamız ki, işğal etilgen Qırımda yaqarlıq qıtlığı işğalli akimiyetni benzin stantsiyalarında "kart"larnı kirsetmege mecbur etti. Ukrayina tış istihbarat hızmetiniñ malümatına köre, olarnı tek şirketler ve teşkilâtlar ala.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız